La temporada d’iviernu del aeropuertu d’Asturies empieza con 22 destinos regulares y la llegada de l’aerollinia Wizz Air
La temporada d’iviernu del aeropuertu d’Asturies empieza esta medianueche con una programación de 22 destinos regulares, 14 nacionales y ocho internacionales, que se va enllargar hasta la última selmana de marzu. La ufierta incorpora nueves conexones y refuerzos en delles rutes, que contribúin a ameyorar la conectividá mientres los meses de menor presión de visitantes. La Estratexa de Conectividad Aérea del Gobiernu d’Asturies sigue impulsando asina comunicaciones con otros territorios y la proyección turística y económica de la comunidá.
Una de les novedaes de la temporada ye la llegada de l’aerollinia Wizz Air, qu’empezó a ufiertar esta selmana una conexón directa col aeropuertu de Luton, en Londres. La compañía europea, con amplies perspectives de crecedera, conviértese na décima qu’opera nel aeropuertu asturianu y amplía les opciones pa viaxar al Reinu Uníu.
La ruta con Londres-Luton cunta con trés frecuencies selmanales mientres la temporada d’iviernu: los martes, xueves y domingos. Los vuelos van caltenese tol añu y van realizase n’aeronaves de 239 places. Esti aeropuertu londinense constitúi una de les bases d’operaciones de la compañía y ufierta conexones directes con más de 70 destinos, lo qu’amplía les posibilidaes de viaxe dende Asturies per aciu enllaces posteriores.
La incorporación de Wizz Air va tener continuidá nes próximes selmanes cola apertura d’otres dos rutes. Asina, na primer selmana de payares, l’aerollinia prevé empecipiar cuatro frecuencies selmanales con Madrid (llunes, miércoles, vienres y domingos) y cinco con Valencia. Estes conexones van reforzar la ufierta nacional y van aumentar les opciones disponibles pa la población asturiana.
Más frecuencies y nueves rutes tol añu
La ufierta nacional de la nueva temporada inclúi Madrid, Barcelona, Valencia, Alicante, Mallorca, Sevilla, Málaga, Xerez y Granada, amás de Tenerife Norte, Tenerife Sur, Gran Canaria, Lanzarote y Fuerteventura. Nel ámbitu internacional, van ufiertase conexones con Londres, París, Milán, Roma, Florencia, Porto, Lisboa y Bruseles, destinos que refuercen los venceyos d’Asturies con mercaos turísticos y ciudaes d’especial interés económicu y cultural.
La programación d’iviernu destaca tamién pol refuerzu de la operativa nacional, con más vuelos a Canaries al traviés de Binter y Vueling, y hasta doce salíes selmanales a Valencia, gracies a la incorporación de Wizz Air. Amás, va haber conexones tol añu con Xerez, Porto y Florencia, operaes por Volotea, una meyora que dexa ampliar les opciones de desplazamientu más allá de la temporada alta.
La ruta a Madrid va cuntar con conexones de cuatro operadores nesta temporada. Air Europa, qu’empezó a ufiertar dos vuelos diarios en xunu, caltién la conexón col so hub internacional, que facilita especialmente’l saltu p’América. Tamién Iberia y Air Nostrum refuercen la so ufierta de places a la capital española. Amás, Wizz Air incorpora cuatro vuelos selmanales y Volotea caltién la so operativa a partir del 8 de xineru.
