La Universidá d’Uviéu lidera un proyectu d’investigación que va dexar desenvolver antenes pa los vehículos ensin tripular que se van emplegar na esploración del interior de les cueves y túneles de la Lluna. Estes cueves formáronse fai miles d’años debíu al enfriamientu de fluxos de lava basáltica nel satélite terrestre. El proyectu, que lleva por nome Antennas for underground communications, ta financiáu pola Axencia Espacial Europea (ESA) y realízase en collaboración cola Universidá de Vigo y Grupu Eosol.
El profesor Germán Llión Fernández, investigador del Departamentu d’Inxeniería Eléctrica, Electrónica de Computadores y Sistemes, de la Universidá d’Uviéu, esplica que, na lluna, los tubos de lava basáltica pueden llegar a tener dellos kilómetros de llargu y diámetros de cientos de metros. “Puede aportase a los tubos de lava al traviés de tragaluces o xameos, que ye como se conocen nes Isles Canaries, esto ye, un pozu vertical ente’l tubu de lava y la superficie llunar”.
El propósitu del actual proyectu ye apurrir un enllaz de comunicaciones estable d’alta velocidá, d’una distancia mayor de 200 metros y con un mínimu de trés puntos d’accesu, gracies al desenvolvimientu d’una nueva antena. “Unu de los retos a los qu’enfrentamos ye que l’escenariu ye totalmente desconocíu y puede tener estrechamientos y desprendimientos polo que tanto la flota de robots esploradores como’l sistema de comunicaciones tienen de tar preparaos p’arreglar toes estes dificultaes”, destaca.
A lo llargo del proyectu realizará’l modeláu del espardimientu d’ondes electromagnétiques nes cueves y va definise l’arquitectura del sistema de comunicaciones inalámbricu propuestu, de forma que pueda escoyese la meyor banda frecuencial. “Vamos fabricar dellos prototipos que van ser validaos na cámara anecoica de la Universidá d’Uviéu y, en definiendo la solución final d’antena, vamos realizalo, a midida, na cueva Los Verdes, en Lanzarote, Gran Canaries (España)”, comenta’l Germán Llión. El proyectu ta lideráu por un grupu d’investigadores del Área de Teoría de la Señal y Comunicaciones de la Universidá d’Uviéu, encargaos, principalmente de la coordinación técnica y la fabricación y midida de los prototipos que se desenvuelvan.
Esti trabayu ye continuación del proyectu Robocrane, tamién lideráu pola Universidá d’Uviéu y escoyíu pola ESA dientro d’una campaña d’idees pa la esploración de cueves llunares. Robocrane foi’l primer analís d’una estructura capaz d’esplegar robots esploradores nun tubu de lava llunar, proporcionales alimentación y establecer comunicación ente ellos y la Tierra.
Dambos proyectos, según espliquen los sos autores, representen una meyora importante escontra’l posible usu de les cueves de la Lluna como abellugu de futures esploraciones planetaries, onde l’accesu del área soterraña va ser esencial pa garantizar la so habitabilidad. Estos cuévanos tán protexíes de la radiación, el bombardéu de micrometeoritos y partícules provenientes del vientu solar, amás de tener condiciones térmiques más estables.
