La Unidá d’Igualdá de la Universidá d’Uviéu, en collaboración cola Cátedra de Feminismu y el Conseyu d’Estudiantes, llanza’l programa Vixíes de la Igualdá, col que busca garantizar que les ferramientes contra la desigualdá de xéneru lleguen a tola comunidá universitaria al traviés de persones que sirvan de referente en caún de los campus y centros. L’oxetivu ye que quien tengan qu’arreglar cualquier conflictu o dulda nesta materia tengan una figura a la que recurrir pa conocer los mecanismos de tutela de los que dispón la institución académica asturiana.
Pa ello, va dar en designar en cada centru a dos “vixíes”, que la so misión va ser sirvir d’enllaz ente’l contestu del centru y l’Unidá d’Igualdá. Una d’eses persones va escoyese ente l’estudiantáu y la otra, ente’l Personal Docente ya Investigador (PDI) y el Personal Técnicu de Xestión, Alministración y Servicios (PTGAS). Esta rede de sofitu va texese a partir de voluntarios que van recibir una formación específica pa conocer les ferramientes disponibles y treslladales a quien les solicite.
“Trátase de que cualquier persona que quiera facer usu de dalgún de los preseos específicos de tutela de la igualdá de los que dispón la Universidá d’Uviéu sepa a quién allegase nel so centru d’estudios o llaboral pa que-y lo espliquen de manera cenciella, qué tien que facer y a quién dirixise”, esplicó la directora d’área d’Igualdá y Diversidá, Paz Menéndez Sebastián.
Les persones qu’actúen como Vixíes de la igualdá van poder ufiertar información rellacionada colos protocolos de prevención del acosu; protocolos de cambéu de nome pa les persones transxéneru; disponibilidá de sales de llactancia; asesoramientu en materia de derechos de conciliación, protección a víctimes de violencia de xéneru, etcétera. La so misión ye, de primeres, facilitar a quien alleguen a ellos o elles un primer aproximamientu a los preseos disponibles y, de segundes, pone-yos en contactu cola Unidá d’Igualdá, que va ser la encargada de realizar un siguimientu personalizáu de la situación.
“D’esta manera, el serviciu qu’empresta la Unidá d’Igualdá va ser más accesible pa tola comunidá universitaria”, defendió Menéndez Sebastián, quien anima tanto al estudiantáu como al personal a arreyase como voluntarios nesti proyectu de proximidá. Pa ello, la Unidá abrió un plazu nel que toles persones interesaes en convertise en Vixíes de la igualdá pueden manifestar el so interés. Les persones designaes van dase a conocer nos actos previstos con motivu del 8 de marzu, Día Internacional de la Muyer.
“El nomamientu va ser debidamente acreditáu y va esixir unes conocencies básiques d’igualdá, que van ser facilitaos pola Unidá nuna sesión formativa”, manifestó la directora d’área d’Igualdá y Diversidá. “Va ser una esperiencia mui enriquecedora”, defendió Paz Menéndez de Sebastián animando a tola comunidá universitaria a collaborar cola iniciativa.
