Más de 15 años de trabayu en física de partícules resumíos nuna publicación científica d’altu nivel. El grupu de Física Esperimental d’Altes Enerxíes de la Universidá d’Uviéu acaba de publicar un artículu estraordinariu nuna de les revistes más prestixoses nel campu de la física, Physical Review Letters, que recueye les sos aportaciones más destacaes pa la meyora de física de partícules, una caña qu’estudia los componentes elementales de la materia y les interacciones ente ellos. L’estudiu vio la lluz gracies al trabayu desenvueltu por esti grupu de la universidá asturiana colos aceleradores de partícules Tevatron y LHC.
L’artículu resúmese nel gráficu qu’acompaña esta información. Lo insólito d’esta figura, según el grupu asturianu, ye que, de les 14 midíes qu’apaecen nella, el investigadores de la Universidá d’Uviéu realizaron íntegramente nueve. “Caún d’estos puntos d’enerxía supon años de trabayu ya implica un entendimientu bien fondu y detalláu de los datos recoyíos, amás de numberosos estudios complementarios”, comenta Bárbara Álvarez González, investigadora Ramón y Cajal del Departamentu de Física de la Universidá d’Uviéu.
Lo interesante de caúna de les midíes que formen parte de la figura ye que dexaron comparar refechamente les predicciones teóriques del modelo estándar de la física de partícules a les enerxíes que se producieron en colisionadores de partícules nos postreros 15 años. Los autores del trabayu espliquen que’l llamáu modelu estándar ye de xuru la teoría física con mayor capacidá predictiva. Cualquier observación de dalguna diferencia significativa que s’alloñara del modelu estándar supondría la presencia de nuevos procesos físicos non predichos por esta teoría.
Y eso ye precisamente lo que tán buscando tolos grupos piqueros de física de partícules: la llamada nueva física: fenómenos fundamentales que nun tán descritos polos modelos actuales. “Sabemos qu’esiste esta nueva física porque esiste la materia escuro, pero desconocemos cuálos son los sos constituyentes, cuálos son les sos partícules fundamentales nin cómo interactúan. Tien qu’esistir una nueva física, que s’alloña del modelu estándar, que lo esplique”, comenten los investigadores.
Hasta agora, sicasí, les resultancies llograes colos esperimentos realizaos con el aceleradores de partícules nun s’estremaron del llamáu modelo estándar. L’apaición de nicios que confirmaren empíricamente la esistencia de la llamada nueva física sería un pasaporte seguru escontra’l Nobel, según el investigadores de la Universidá d’Uviéu.
El Grupu de Física Esperimental d’Altes Enerxíes de la Universidá d’Uviéu, integráu nel Institutu Universitariu de Ciencies y Tecnoloxíes Espaciales (ICTEA), ta formáu por ocho doctores y seis investigadores predoctorales y participa viviegamente dende 1996 nos esperimentos que se lleven a cabu na Organización Europea pa la Investigación Nuclear, popularmente conocíu como’l CERN. Los barganal de 3.000 investigadores que trabayen nesti llaboratoriu dientro del esperimentu CMS (Compact Muon Solenoid) publiquen en redol a cien artículos al añu, más d’un millar dende 2008. La contribución de la Universidá d’Uviéu ye bien significativa.
Los autores del artículu destaquen, cuando se-yos entrugó pola utilidá de los sos trabayos, que tamos falando siempres de ciencia básica, non aplicada. “La utilidá de la ciencia básica ye producir conocencia, como’l qu’apurrimos nesti artículu, que pueda ser utilizáu darréu na busca d’aplicaciones práctiques”, comenten. “Cuando Joseph John Thomson afayó l’electrón, taba faciendo ciencia básica. Naide entós pensaba na so utilidá”, conclúin.
