La Universidá d’Uviéu abrió seis sales de llactancia pa estrayer y caltener lleche materno. Estes árees tán distribuyíes per tolos campus d’Uviéu, Xixón y Mieres. Les sales nueves de llactancia tán disponibles pal so usu a demanda por toles muyeres llactantes de la comunidá universitaria: personal d’alministración y servicios, personal docente ya investigador y estudiantáu.
Estes sales nueves de llactancia de la Universidá d’Uviéu, una midida pionera nel conxuntu d’universidaes españoles, presentáronse el pasáu vienres nel Campus de Mieres, cola presencia del rector Ignacio Villaverde y la directora del Área d’Igualdá, Paz Menéndez Sebastián. Villaverde destacó qu’estos nuevos recursos respuenden al compromisu adoptáu pol equipu de gobiernu de la Universidá y recoyío nel II Plan d’Igualdá de la Universidá d’Uviéu, qu’inclúi un apartáu específicu dirixíu a la prevención de riesgos llaborales con perspectiva de xéneru. Nesti contestu, la directora del Área d’Igualdá esplicó que la Llei de Prevención de Riesgos Llaborales obliga a les empreses a facer una evolución de riesgos específica cuando la madre trabayadora regresa al so empléu y ta dando’l pechu.
Les sales de llactancia diseñáronse pa que les muyeres puedan estrayese y caltener correctamente’l lleche. Con esti propósitu, habilitóse en caúna d’elles una zona hixiénica idónea, con respetu absolutu de la intimidá, sillón pa la estraición, conexón llétrica y nevera pa caltenimientu.
Les sales nueves van llocalizase nes siguientes ubicaciones:
- Campus d’El Cristo A: Edificio Rector López Cuesta. Módulu 4. Aulariu Ciencies Xurídico Sociales. Planta baxa. Despachu númeru 3.
- Campus d’El Cristo B: Departamentu de Melecina, despachu D03 3er Planta Facultá de Melecina.
- Campus de Llamaquique: Facultá Profesoráu. Antigua cocina de la cafetería (Edificiu Sur).
- Campus d’El Milán: Cuartu almacén, 1er planta Aulariu A.
- Campus de Mieres: Edificiu d’investigación, 1er Planta. Viveru d’Empresa 4B.
- Campus de Xixón: Aulariu Sur, frente a Sección de Alumnos (Alministración).
