Miembros de la Área d’Inxeniería de los Procesos de Fabricación de la Universidá d’Uviéu, xunto cola Rzeszów University of Technology (Polonia) y la Kaunas University of Technology (Lituania), participen nel proyectu TEDI, una iniciativa europea que pretende fomentar los intercambios d’estudiantes y profesores ente les trés instituciones nel ámbitu de les inxenieríes industriales. TEDI (Teamwork-based Education and Digitalization as an approach for the interdisciplinary engineering training) cuenta con financiamientu de la Unión Europea dientro del programa de cooperación n’Educación Cimera Erasmus+ KA220-HED.
La presentación del proyectu va tener llugar mañana xueves, 23 de xineru, a les 10:00 hores, na Aula Magna de la Escuela Politécnica d’Inxeniería de Xixón (Aulariu Sur del Campus de Xixón). Tán convidaos a asistir tolos estudiantes d’inxeniería de les cañes industriales, mesmo que’l so profesoráu. L’alcuentru va dexar compartir colos asistentes los datos claves d’esta iniciativa de movilidá.
TEDI busca ameyorar y arreglar la escasa esistencia de formación interdisciplinar ya internacional ente estudiantes universitarios y, concretamente, ente les universidaes participantes (Polonia, Lituania y España). Los sos oxetivos céntrense en realizar cursos interdisciplinares, en modalidá online y presencial, pa estudiantes de les trés universidaes. El proyectu tamién busca l’intercambiu de práctiques, la collaboración docente, l’intercambiu de recursos internos y d’infraestructures. En definitiva, trátase de desenvolver un enfoque al llargu plazu en relación cola formación interdisciplinar. El proyectu, que se punxo en marcha’l 1 de setiembre de 2024, tien una duración de trés años, a lo llargo de los cualos van caltenese intercambios periódicos d’alumnos y docentes fomentando la formación interdisciplinar ya internacional.
TEDI pretende tamién algamar los siguientes resultaos: aumentu de les formaciones internacionales realizaes nes universidaes participantes, preparación de nuevos materiales que sofiten l’ampliación de la collaboración internacional de profesores ya investigadores, promoción de formación interdisciplinar por distintes canales y creación de nuevos grupos interdisciplinares ya internacionales d’estudiantes y profesores pa futures collaboraciones.
Los 4 cursos piloto programaos nel proyectu son los siguientes:
- Inspection, Research Data Collection and Analysis. Polonia, mayu 2025
- The Usage of Software Tools for Modern Product Development Processes. Online, xineru 2026
- Conceptualization of Complex Product Development. Lituania, mayu 2026
- Quality in Additive Manufacturing (AM). España, abril 2027.
