La Universidá d’Uviéu amplió’l so programa d’esta edición de Mercaplana. La institución académica va triplicar los talleres que se van desenvolver a lo llargo del eventu, que va tener llugar del 21 d’avientu al 4 de xineru nel recintu ferial Luis Adaro. Los talleres que se van impartir son Ciencia de colores (de 4 a 6 años), Cromatografía: colores a la carrera (de 4 a 6 años), Camisetes con ciencia (de 4 a 12 años), Inventos voladores (de 6 a 12 años), Revelamos solombres (de 4 a 12 años) y Una esplosión química (tolos públicos). Les inscripciones van realizase presencialmente nel mostrador del estand.
Universidá pa guaḥes ye un proyectu pioneru n’España col que la Universidá d’Uviéu pon en marcha un programa de cultura y ciencia dirixíu a neños d’educación infantil y primaria. Inclúyense ciclos de talleres STEAM (Ciencia, Tecnoloxía, Inxeniería, Arte, Matemátiques), organización d’eventos científico-lúdicos y actividaes culturales diverses impartíes n’espacios universitarios, coordinaes por personal científico de la Universidá y de calter gratuitu. Con esti programa, que se desenvuelve de forma estable a lo llargo del cursu académicu, promuévese l’aprendizaxe basáu na esperimentación y resolvimientu de problemes.
