La Vuelta Asturies presentó nel Centru Comercial Los Prados una edición nueva de la carrera per etapes asturiana, qu’amuesa esti añu un percorríu renováu y qu’amuesa cambeos importantes nel desenvolvimientu de la prueba ciclista que va tar n’Asturies los díes 26, 27 y 28 d’abril.
La primer etapa va ser ente Uviéu y La Pola L.lena, una etapa que yá ye fixa na Vuelta Asturies, pero que tamién tien dellos cambeos nel so desenvolvimientu, cola eliminación del Altu del Carabanzu y una xubida final al Cordal enantes d’aportar a la capital l.leniza, que de xuru va marcar diferencies de cara a la xeneral.
Na segunda xornada de ciclismu peles carreteres asturianes, el percorríu casi tradicional pel suroccidente y cola xubida a L’Acebu camuda pa ser protagonista l’oriente asturianu. Ribeseya va ser la meta d’una etapa que va desenvolvese per altos tan decisivos como l’Altu del Tornu, nun percorríu interesante y renováu tres d’años ensin la presencia oriental na prueba.
A lo último, la tercer y etapa final va tener un percorríu similar al d’otros años, pero con salida dende Benia d’Onís. Dende ellí y con dirección a Uviéu, pasarán pel decisivu Altu del Violeo enantes de baxar a la meta de la Cai Uría, nel centru de la capital asturiana.
Una edición renovada de la carrera asturiana que, amás, cunta cola presencia de dos equipos WorldTour, el Movistar Team, escuada fixa en tolos ediciones de la ronda asturiana, y el UAE Emirates Team, equipu de la figura del ciclismu Tadej Pogacar. En total, 14 equipos van percorrer les carreteres asturianes donde, de xuru, va tar unu de los ciclistes nuevos nesta temporada nel pelotón internacional y asturianu, Samuel Fernández, del Caja Rural – Seguros RGA. La carrera yá ta lanzada.
