La xusticia dixital va tar implantada n’Asturies nel primer trimestre del 2020

El primeru de los cuatro proyectos que van esaniciar el papel va arrincar a finales d'esti mes

0
72
La xusticia dixital va tar implantada n’Asturies nel primer trimestre del 2020

La xusticia dixital va tar implantada nel primer trimestre del 2020. Esta ye la previsión del Gobiernu asturianu y el Ministeriu de Xusticia pa establecer y desenvolver unos procedimientos que van ufiertar a la ciudadanía un serviciu más áxil, eficiente y tresparente. D’esta manera garantízase la compatibilidá y la integración de los sistemes y aplicaciones de l’alministración xudicial electrónica y les fiscalíes.

El grupu técnicu d’implantación de los cuatro proyectos que van facer posible una xusticia ensin papeles constituyóse esta mañana n’Uviéu cola mira de que tean operativos nos primeros meses del 2020 y funcionen a plenu rendimientu nel primer semestre d’esi añu. A esta primer xunta asistieron la viceconseyera de Xusticia, Encarnación Vicente; el director xeneral de Sector Públicu, Seguridá y Estratexa Dixital, Javier Fernández, y el presidente del Tribunal Superior de Xusticia d’Asturies (TSXA), Ignacio Vidau, xunto con representantes de los gobiernos autonómicu y central.

La implantación progresiva del espediente xudicial electrónicu va entamar esti mes n’Uviéu

Según alcordó’l grupu, la xusticia dixital va arrincar n’Asturies a finales d’esti mes cola implantación progresiva del espediente xudicial electrónicu n’Uviéu hasta completar toles sedes xudiciales de la comunidá, qu’incluyen les ocho oficines de rexistru y repartu, los trés servicios comunes de notificaciones y embargos, los 105 xulgaos, les ocho secciones de l’Audiencia Provincial y les cinco sales de la TSXA.

Esti procesu ye’l más llargu y dificultosu, yá qu’afecta a un númberu mayor d’usuarios y de sedes, polo que se prevé que s’enllargue mientres mediu añu aprosimao.

Tamién esti mes va ponese en marcha’l programa Orfila, una aplicación de xestión electrónica de los espedientes periciales pa que l’Institutu de Medicina Llegal pueda xestionar los informes médicos solicitaos polos órganos xudiciales.

La sede xudicial electrónica y la fiscalía dixital van empezar a implantase a primeros del 2020, previsiblemente en febreru, pa que tolos proyectos tean operativos nel primer trimestre del añu. Mientres esti periodu va cuntase con personal d’apoyu técnicu pa resolver duldes y incidencies y garantizar l’éxitu del procesu.

Beneficios pal conxuntu de la ciudadanía

La xusticia ensin papeles supón ventayes a los órganos xudiciales, los profesionales y la ciudadanía porque amenorga pasu ente pasu l’usu de papel; aumenta la seguridá gracies a la firma electrónica; dexa la tramitación electrónica de tolos asuntos; facilita la xestión dixital de les ordes xudiciales; consigue más axilidá y dilixencia al simplificar los procedimientos, y facilita les consultes al traviés de visores electrónicos.

Pa la implantación de toos estos procesos, el Principáu acometió una renovación tecnolóxica importante cola compra de sistemes de videoconferencia, monitores, escáneres, imprentadores y ordenadores. Tamién instaló dobles pantalles a tol personal y un sistema nuevu de grabación de vistes xudiciales nes sedes d’Uviéu y Xixón. Too ello supunxo una inversión de cerca de dos millones d’euros. Amás, dotó a la xusticia de servidores nuevos y a tolos equipos informáticos d’un sistema operativu capaz de soportar les soluciones tecnolóxiques nueves.