L’Acuariu de Xixón, xestionáu pola empresa concesionaria RAIN FOREST, completó les inversiones comprometíes por contratu para los años 2018, 2019 y 2020 acordies con el cronograma previstu, que recueye actuaciones hasta 2023.
Les meyores realizaes hasta la fecha, que xuben a 440.903 euros, inclúin el reacondicionamientu de distintes instalaciones que presentaben defectos per falta de caltenimientu, la reforma del hall y la tienda, el desenvolvimientu de nuevos conteníos educativos, la ellaboración d’una nueva estratexa d’atracción de visitantes, la redacción d’un nuevu plan de la colección biolóxica y la implementación d’un nuevu plan de recursos humanos, ente otres actuaciones.
Amás, la empresa concesionaria asumió, a mayores, la remodelación de la cafetería, camudando’l so allugamientu, y la creación d’un nuevu restorán, por un importe de 220.000 euros.
La intención del Conceyu ye adelantar les actuaciones correspondientes a 2021 y 2023, que nun entamu prevíen la remodelación de la zona del ríu Cantábricu y la construcción d’un nuevu pingüinariu, la empresa Rain Forest presentó un nuevu proyectu nel que propón la creación d’un gran oceanariu en sustitución del pingüinariu previstu.
Va llevase a estaya tamién la reforma integral de les fachaes esteriores y de la totalidá del interior de les instalaciones. Ye un proyectu que va suponer un redimensionamientu del acuariu, convirtiéndolu nun equipamientu singular y de referencia nel ámbitu européu, y pal que la empresa trabaya agora na busca de financiamientu, qu’asitia nos 20 millones d’euros.
