La Academia de la Llingua Asturiana unvió a la responsable ministerial una carta roblada pol Presidente de la Institución, Xosé Antón González Riaño, na que se-y fai alcordanza de la necesidá del reconocimientu de la especialidá docente de Llingua Asturiana y Lliteratura pal profesoráu de Primaria y Secundaria. Amás, na mentada carta, el presidente recordaba la precariedá d’esti profesoráu y demandaba «al Ministeriu un cambéu de los Decretos d’Especialidaes Docentes pal profesoráu d’Educación Primaria y Secundaria na que se faiga constar que tamién van poder ser especialidaes les correspondientes a les llingües propies non oficiales, pero xurídicamente reconocíes como tales, con implantación curricular y a pidimientu de la Comunidá Autónoma».
