La 30ª edición de la esposición inaúgurase mañana en Xixón y va tar abierta al públicu hasta’l 28 de febreru
La 30ª edición de l’Amuesa d’Artes Plástiques del Principáu, que se va inaugurase mañana, a les 19:30 hores, na sala 1 del Centru de Cultura Vieyu Institutu de Xixón, va esibir la obra d’Elisa Cuesta, gallardonada col Premiu Asturies Xoven d’Artes Plástiques 2019, y va incluyir obres de los otros cinco creadores escoyíos nesi certame: Juan Falcón, Mon de Cabrales, Jorge Fernández, Noemí Iglesias y Nacho Izquierdo.
La esposición podrá visitase en Xixón hasta’l 28 de febreru y darréu va empecipiar un circuitu per distintes sales del país. La directora xeneral del Institutu Asturianu de la Mocedá, Clara Sierra, y el director de la Fundación Municipal de Cultura Educación y Universidá Popular de Xixón, Miguel Barrero, van participar mañana nel actu inaugural.
La esbilla de los artistes corrió al cargu de un xuráu formáu por críticos d’arte, galeristes y otros profesionales de reconocíu prestixu del mundu de les artes plástiques como Luis Féas, críticu d’arte y comisariu d’esposiciones; Patricia Villanueva, responsable d’esposiciones de Llaboral Centru d’Arte; Jaime Luis Martín, director del Valey Centru Cultural de Castrillón, y Gema Llamazares, galerista.
Elisa Cuesta ye una creadora asturiana afincada en Madrid, onde estudió Belles Artes ya Inxeniería en Diseñu Industrial na Universidá Nebrija y el cursu n’especialización n’Infografíes Avanzaes y Diseñu Computacional de la Escuela Técnica Cimera d’Arquitectura. Anguaño ye la coordinadora artística de Tentacular, el festival de tecnoloxíes crítiques y aventures dixitales de Matadero Madrid.
La Conseyería de Presidencia, al traviés del Institutu Asturianu de la Mocedá y dientro del Programa Culturaquí, convoca cada añu l’Amuesa d’Artes Plástiques, dirixida a mozos artistes menores de 35 años, asturianos o residentes n’Asturies, y descendientes d’hasta segundu grau d’emigrantes. El certame valora tou tipu de propuestes artístiques: pintura, escultura, fotografía, dibuxu, instalaciones, videoinstalaciones, etcétera, con tema, técnica y materiales a llibre elección.
