Les fuerces de la izquierda piden la comparecencia de Carmen Moriyón nel próximu Plenu del mes de xunetu tres ser condergada por usu indebíu de dineru públicu. PSOE, Izquierda Xunida y Podemos critiquen que l’alcaldesa nun informó a les vecines y vecinos de la esistencia de la sentencia del Tribunal de Cuentes pola que debe reintegrar al Conceyu de Xixón 31.314’29 euros y l’abonu de los intereses devengaos dende que se producieron los fechos; tamién tapecío otra condena por imputar los costos d’un profesional priváu pa un procesu xudicial particular a les subvenciones de gastos del Grupu Municipal de Foro, el so partíu.
Los voceros Luis Manuel Flórez ‘Floro’, Javier Suárez Llana y Olaya Suárez resaltaron en rueda de prensa celebrada ayeri que ye la primer vegada na hestoria democrática del conceyu qu’un
miembru de la corporación ye condergáu por fechos tan graves y repitíos. Señalen, nel pidimientu de comparecencia suscrita, que “fechos como esti son los que contribúin a amumentar la desafección ciudadana pola política convirtiéndose esta desafección nunu de los mayores peligros pa la democracia”. Aportunen, amás, na esistencia “d’una cierta continuidá o repetición nel
tracamundiu que l’alcaldesa caltien ente’l patrimoniu priváu y los caudales públicos”.
Por too ello, esixen conocer los gastos que motivaron la conderga y les cantidaes reintegradas; si se ta imputando otru gastu a la asignación de dineru públicu del grupu municipal de Foro; si l’alcaldesa o dalgún otru conceyal o conceyala de Foro Asturies, o’l personal al serviciu del grupu municipal o’l personal eventual del Conceyu, percibieron tamién otres cantidaes en conceptu de dietes con cargu a los fondos del grupu municipal amás de les que consten na sentencia; y si’l grupu municipal de Foro Asturies, como empleador del so personal, inclúi les dietes abonaes nes comunicaciones unviaes a l’Axencia Tributaria sobro pagos efectuaos.
En rueda de prensa, el voceru del Grupu Municipal Socialista recordó que los trés partíos presentes yá pidieron la dimisión por unos fechos que’l Tribunal de Cuentes calificó como graves y calteníos nel tiempu. “En cuenta de encarar el problema y dar les esplicaciones a la ciudadanía tres reconocer los fechos, l’alcaldesa fai tolo contrario, retuerce’l llinguaxe hasta l’estremu de querer amenorgalo a un erru contable’ cuando la sentencia la conderga como responsable directa de gastos irregulares de fondos del Conceyu; intenta semar confusión col términu allanamientu y el so significáu, o cuando fala de ‘odiu fondamente antidemocráticu’ cuando pidimos la so dimisión”, critica Floro de la que conclúi que “la ciudadanía esíxenos a les persones que tamos en política un comportamientu exemplar al altor de les xeres que tenemos de desempeñar al respective de la institución y lo que representa”.
Pela so parte, el voceru municipal d’Izquierda Xunida, Javier Suárez Llana, convidó a la reflexón del conxuntu de grupos políticos municipales al preguntar cuál sería la respuesta de los partíos que conformen güei’l gobiernu de Xixón si la sentencia afectara a cualesquier otru edil de la corporación.
Mientres, la vocera del grupu municipal de Podemos Xixón, Olaya Suárez, afondó en que “equí nun hai nengún erru contable, sinón que se cobraron sobresueldos de forma repitida mientres meses”. La edil morada llamentó les “continues faltes de respetu del gobiernu municipal a la institucionalidá d’esti Conceyu, pero agora tamién a tola ciudadanía de Xixón” pola falta d’esplicaciones, polo que xustificó la comparecencia de l’alcaldesa “pa que dexe de toma-y el pelo a la xente”. Amás, preguntóse “qué piensa’l Partíu Popular” y “si la señora vicealcaldesa ta conforme cola sentencia del Tribunal de Cuentes”.
