Fai 12 años nació l’asociación El Telar en Xixón. Y nació pa texer suaños na zona sur de Xixón. Suaños entretexíos con llanes distintes; pa cubrir distintes necesidaes y cola cuenta de construyir un telar comuñal onde caben toles persones.
Esi telar comuñal sostien: que más de 800 mozos sigan teniendo’l so espaciu pa tar y pa esfrutar d’un ociu alternativu con EL SUAÑU; que 12 chavales y les sos families puedan sentise acompañaes socioeducativamente na so redolada próxima col Espaciu Comuñal d’Aprendizaxe; que les entidaes de la economía solidaria d’Asturies sigan entretexendo redes; y que los barrios de la zona sur de Xixón esfruten d’iniciatives colectives coles que texer relaciones comuñales de vecindá.
Nos últimos años los fondos provenientes de l’alministración, que sostienen estos texíos comuñales, viéronse recortaos pola voluntá política de l’alministración de nun tener en cuenta los proyectos pequenos y de base comuñal como «El Telar». Esto supón un retayu del 45% poniendo la so continuidá en riesgu. Por ello, dende la Fundación Coop57, Coop57 Asturies conjuntamente con “El Telar”, empecipien una campaña de micromecenazgo pa garantizar la viabilidá d’estes iniciatives y pa denunciar la dificultá d’accesu a recursos públicos de les entidaes de base comuñal y solidaria.
Pue collaborase con esti proyectu nesti enllaz.
