L’Atenéu Obreru de Xixón celebra esti sábadu la quinta sesión del seminariu «Acuerdos y Desacuerdos, nel que se pretende crear un diálogu sobre cultura y política en Xixón, centrándose amás nel tema audiovisual.

Mientres la mañana del 11 de marzu, el Centru de Cultura Antiguu Institutu va acoyer tres diálogos con referentes de la cultura:

A les 10:30 va entamar el diálogu La transición audiovisual, futuro digital. Va aldericase sobre l’estáu actual de la cuestión en Xixón, dende la vida creativa profesional y amateur hasta les polítiques públiques pal so desenvolvimientu anguaño, nel marcu de les tresformaciones aceleraes pol andanciu. Va cuntar coles intervenciones de Monica Yugueros y Cristina F. Caldueño y va tar moderao por Luis Pascual.

A les 11:30 empecia l’alderique El audiovisual ¿asunto de gobierno?, nel que se va reflexonar al rodiu de les llimitaciones actuales de posibles midíes que permitan la meyora de les condiciones de trabayu nel sector y traten los problemes derivaos de los sos actuales ecosistemes caltenibles, donde les posibilidaes actuales hasta los escenarios futuros de participación y la so función social. Va tar moderao por Emilia Vázquez y van intervenir Ramón Lluis Bande, Inaciu Galán y Román García.

A les 12:45 va empezar l’últimu diálogu de la sesión, El metaverso y más allá. Nesti casu, va facese una puesta en común de tolos aspectos rellacionaos cola capacidá d’instituciones, colectivos y empreses de promover y/o collaborar na producción d’imaxinarios compartíos na comunidá como contribución a la xeneración de capital cultural. Va tar moderao por  Jorge Fernández León y van intervenir Iván Fernández Lobo y Eva Güimil.