L’Ayuntamientu de Xixón alzó esta mañana al nivel 1 el Protocolu d’actuación n’episodios de contaminación del aire na zona Oeste de Xixón, que permanez activáu dende’l 18 de xineru. Dende’l pasáu vienres y hasta esta mesma mañana, el Protocolu permanecía nel so nivel 0 con calter preventivu.
La conceyalía de Mediu Ambiente decidió güei activar el nivel 1 d’avisu énte los datos rexistraos mientres los últimos díes nes estaciones de midida de la zona Oeste de la ciudá. En concretu, la estación d’El Llauredal atropa trés díes consecutivos de superaciones tanto de PM10 como de PM2,5, y les estaciones d’ARCELOR MITTAL y Arxentina suman dos díes consecutivos de superaciones pa dambos contaminantes.
Les estaciones de midida de la zona Oeste nun son les úniques qu’estos díes tán rexistrando malos datos de calidá del aire na ciudá. La estación allugada na avenida de la Constitución, clasificada como estación de midida de tráficu, atropa dos díes datos negativos pa dambos contaminantes, especialmente PM2,5, asitiando los índices de calidá del aire ente regular y desfavorable.
La decisión d’alzar el nivel d’activación tómase énte la constatación de que les previsiones de l’Axencia Estatal de Meteoroloxía, favorables pa la dispersión de partícules contaminantes mientres estos díes, nun se tán cumpliendo.
El Protocolu, aprobáu pola Xunta de Gobiernu’l 2 de payares de 2021, establez cuando s’active la implementación d’una serie de midíes en materia de control calidable del aire, dirixíes a amenorgar les emisiones contaminantes y a protexer la salú pública.
Les empreses allugaes na zona qu’operen baxu xuna Autorización Ambiental Integrada (AAI) o xuna Autorización como Actividá Potencialmente Contaminadora de l’Atmósfera (APCA), como ye’l casu d’ARCELOR MITTAL, EDP o l’Autoridá Portuaria, tendrán d’adoptar midíes d’amenorgamientu d’emisiones, estremando los precuros nos procesos industriales susceptibles de xenerar emisiones difuses, realizando riego de viales nes instalaciones industriales y, nel casu de les zones portuaries, humectando permanentemente los atroxos de graneles, viales y demás focos d’emisión difusa, ente otres midíes.
Nel ámbitu de la movilidá, l’activación del nivel 1 del Protocolu implica la llimitación de la velocidá de 120 km/h a 90 km/h nes carreteres de la rede estatal y autonómico del oeste, y la prohibición de la circulación de vehículos pesaos que tresporten graneles sólidos pulverulentos pola avenida Príncipe d’Asturies. Amás, nel restu del ámbitu d’aplicación del Protocolu, va xixilase la circulación de vehículos pesaos con cuenta de comprobar la so llimpieza y la disposición de sistemes d’entoldáu y caxes hermétiques.
Coles mesmes, mientres permaneza activu’l nivel 1 del Protocolu, prohíbese la quema de restos vexetales en suelos non urbanos y va procedese al riego de carreteres y de viales tantu en zona urbana como industrial.
El Protocolu va permanecer activu hasta que s’amenorguen los niveles de partícules contaminantes.
