L’economista Luis Carlos Fanjul va incorporase como diputáu al grupu parlamentariu de Ciudadanos na Xunta Xeneral. Fanjul va sustituir na bancada naranxa a Ana Coto, quien arrenunció al escañu tres sofitar el proyectu de presupuestu pa 2020. El nuevu diputáu de Ciudadanos ye funcionariu públicu, adscritu a la Sindicatura de Cuentes como ayudante d’auditoríes del sector públicu autonómicu dende l’ámbitu del control financieru, del cumplimientu de la llegalidá, lo mesmo que de eficacia y economía. Ente los años 2006 y 2015 formó parte del departamentu d’Intervención nos Conceyos d’Avilés y de Castrillón, n’árees como personal, contratación, contabilidá y presupuestos.
Avilesín y padre de dos fíos, a los sos 50 años, Fanjul asegura qu’Asturies precisa una política «atrevida ya innovadora». Con esi oxetivu, afirma, llega a la Xunta Xeneral «p’aplicar la mio esperiencia y conocencies de l’Alministración Pública pa rellanzar les oportunidaes d’Asturies». Especialmente n’aspeutos como «el talentu de los nuesos mozos, revitalizar la nuesa industria, potenciar el nuesu mundu rural, ameyorar les nueses comunicaciones y resaltar tou lo bonu que tien el nuesu Paraísu Natural fuxendo de frentismos, localismos y pesimismos», añade. Venceyáu a l’agrupación d’Avilés, ye afiliáu al partíu dende l’añu 2015.
