Pa conocer l’aniciu del casu de «Les 6 de La Suiza» hai que remontase a 2017, cuando llega una trabayadora a CNT, en Xixón, p’asesorase y denunciar les sos condiciones llaborales nuna pastelería, la que da nome al propiu casu, onde-y llegaren a provocar una amenaza d’albuertu. A ello sumábase un casu d’acosu sexual nel trabayu. El so estáu emocional yera preocupante porque, dempués de la baxa de maternidá, tenía que reincorporase al so puestu, lo que-y provocaba munchu mieu.
El sindicatu fixo un trabayu de mediación ente la persona y la empresa implicada. D’esta manera, intentaron aconceyar cola empresa, pero nun amosaron nenguna intención, asina que’entamaron cola movilización, que llogró un cambéu d’actitú y que dos persones del equipu d’acción sindical aconceyaren cola empresa. Na xunta, CNT buscó la meyor solución: alcuerdu de cantidaes debíes, salida apautada de la empresa y, un últimu puntu, totalmente secundariu: ver la posibilidá de que la empresa retirara una denuncia penal contra’l noviu d’esta.
Tres nun topar solución, entamó la movilización y l’acción colectiva del sindicatu. Tamién denunciaron toes aquelles irregularidaes que se cometíen y l’acosu sexual, finalmente archiváu por supuesta falta de pruebes, pero que nun s’investigó, como se demostró nel sobreseimientu del casu. Les acciones en sofitu de la trabayadora de La Suiza coincidieron con una campaña del sindicatu escontra la esplotación nel comerciu y la hostelería, lo que dio más altavoz al casu con concentraciones y manifestaciones.
Tres ello, lleguen una serie de socesos que van acabar coles sentencies de carcel pa seis de les persones que sofitaben el casu. En pallabres de les protagonistes «detuvieron a les trés compañeres que concretáramos la xunta, supuestamente por un intentu de obstrucción a la xusticia y denunciáronnos, en más d’una decena d’ocasiones, por esa mesma obstrucción a la xusticia, por coacciones graves, amenaces… inclusive asociación ilícita a la CNT».
En tolos casos archiváronse les causes, mesmo nel xulgáu que na Audiencia provincial. Pero tamién s’abrió una instrucción por calumnies que, tres trés años y cuando diba concluyir el procesu d’instrucción, cambió nuna investigación por obstrucción a la xusticia y coacciones. Magar de que se recurriere porque l’Audiencia dixera en repitíes ocasiones que nun había casu, finalmente xulgáronlos por eso. Mientres les distintes instrucciones, más de 40 persones tuvieron imputaes.
Tres too ello, llegó’l momentu nel que salieron les sentencies condenatories, que suponíen trés años y mediu de carcel a caúna de les seis persones condenaes baxo’l pretestu de delitos d’obstrucción a la xusticia y coacciones graves. Una sentencia que les protagonistes ven como una condena cola que dar exemplu y persiguir l’acción sindical y de la que resalten que «condenó a 2 persones por dir a una xunta, a 3 por solicitar esa xunta, a 1 por coyer un megáfonu nuna manifestación amás, de condenar a la trabayadora por cuntalo».
Agora, tres la sentencia, les movilizaciones poles 6 de La Suiza siguen el so camín baxo’l lema «Facer sindicalismu nun ye delitu». El 28 de setiembre, nuna unión sindical poques veces vista, una manifestación va percorrer Xixón. Va empezar a les 12:00 hores na plaza del Humedal y va percorrer delles places del centru de la ciudá hasta rematar nel Náuticu.
