Les biblioteques públiques asturianes recibieron l’añu pasáu 1.618.250 visitantes, 608.217 más qu’en 2021. La medría d’actividá apréciase tamién na cifra global de préstamos rexistraos, que xubió, al traviés de les distintes modalidaes habilitaes: físicos, interbibliotecarios, eBiblio Asturies y eFilm Asturies, a 887.833, lo que supón casi 180.000 préstamos más que l’añu anterior.
Tanto les biblioteques que dependen directamente de la Conseyería de Cultura, Política Llingüística y Turismu como la rede d’equipamientos municipales son axentes bien activos en tol territoriu. En total, l’añu pasáu entamaron nes distintes sedes 4.781 actividaes a les qu’asistieron 92.409 persones.
Al zarru del exerciciu, les biblioteques cuntaben con 687.175 socios y 3.068.792 pieces nel so catálogu, incluyendo llibros, publicaciones periódiques, documentos sonoros, vídeos, soporte electrónicu y otros formatos. En 2022 incorporáronse 75.728 nueves referencies al catálogu y sumáronse 64.829 carnés.
Por tipoloxíes, emprestáronse 447.841 llibros d’adultos y 282.841 de lliteratura infantil; 13.935 documentos sonoros y 70.277 vídeos y 404 llibros electrónicos.
