El xueves viniente van inaugurase los cinco primeros centros de la rede pública y autonómica de Les Escuelines/As Escolías, en coincidencia col entamu del cursu escolar y la implantación de la matrícula gratuita pa tol alumnáu de 0 a 3 años. El presupuestu autonómicu destina esti exerciciu 31,15 millones pa poner en marcha esti proyectu educativu, pioneru n’España.
Les cinco escuelines/escolías que se van estrenar el xueves son Los Indianinos, de Colombres (Ribadeva); La Brañona, de Panes (Valle Baxu de Peñamellera); Los Esguinos, de Trevías (Valdés); As Paxarías, de Bual y Los Pequeníos, de Villayón. La escuelina rivadense dispón de dos unidaes y 31 places, ente que les otres cuatro consten d’una unidá y 18 places.
Por proximidá xeográfica, les escuelines de Panes y Colombres van compartir dirección, mesmo que les de Bual y Villayón. La de Trevías va tener la so propia directora. Eses trés places axudicáronse na primer convocatoria d’interinos, celebrada’l pasáu llunes.
Amás, la Dirección Xeneral d’Empléu Públicu contrató yá a doce técniques d’educación infantil (TEI) pa estos cinco centros. En Colombres van trabayar cuatro educadores, al disponer de dos unidaes, y nes otres cuatro escuelines/escolías, dos.
En cuanto al restu d’escuelines/escolías que componen la primer fase de la rede, van inaugurase mientres el cursu escolar 2024-2025, a midida que vaigan rematando les obres de construcción. Ello ye que la intención de la conseyería ye que mientres el mes d’ochobre puedan inaugurase otros trés: La Veiga, de Sotu (Sotu’l Barcu); La Cuevona d’Avín, de Benia (Onís), y Os Ferreiríos, de Santalla (Santalla d’Ozcos).
De los 31,15 millones reservaos pa Les Escuelines/As Escolías, 24,57 millones van destinase a sufragar la gratuidá total de la matrícula. D’esta forma cumple’l compromisu del presidente asturianu, Adrián Barbón, pa esti nuevu cursu escolar, ratificáu pola conseyera d’Educación, Lydia Espina. Los 6,68 millones restantes van emplegase en poner en marcha esta rede autonómica.
La gratuidá total remata un procesu de bonificación progresiva de les matrícules del primer ciclu d’Infantil en función de les rentes de les families. El presupuestu autonómicu de 2023 yá incluyía una partida de 21,3 millones pa eximir del pagu a families con rentes inferiores a los 42.000 euros, lo qu’estendió la gratuidá al 75% de los usuarios.
