El Gobiernu d’Asturies va encarar en 2025 la fase II de la rede autonómica, pública y gratuita de Les Escuelines/As Escolías, qu’inclúi la creación d’otros 19 centros de primer ciclu d’Infantil, distribuyíos en 15 conceyos, que van sumar un total de 34 unidaes, de les que 21 van situase n’Uviéu, Xixón y Avilés. Anguaño va completase la estensión de la rede na zona rural.
Pela so parte, les fases tercer y cuarto, previstes pa 2026 y 2027, respectivamente, van centrar en desaniciar les llistes d’espera nos conceyos d’Uviéu y Xixón. Cuando rematen los cuatro estadios de la rede, va haber escuelines en 70 de los 78 conceyos.
La conseyera d’Educación, Lydia Espina, presentó güei n’Uviéu los detalles de la fase II d’esti proyectu, pioneru n’España, “que va suponer un saltu cualitativu pal sistema educativu asturianu”. Mientres la so intervención, señaló que la escolarización n’edaes tempranes “tien una repercusión directa nel aprendizaxe”, y punxo de relieve la condición de “igualador social” del proyectu. “Da les mesmes oportunidaes a tol alumnáu, ensin importar el llugar nel que more”, valoró.
Asturies va executar directamente 16 escuelines en 12 conceyos, anque nos casos de Navia y El Franco trataránse d’ampliaciones de les yá esistentes. Completen la fase II otros trés n’Ayande, Villaviciosa y Pravia, que van construyir los conceyos con cargu a la última sovención de fondos del Mecanismu de Recuperación y Resiliencia (MRR) concedida pola conseyería, magar van quedar integraos na rede autonómica. Les obres proyectaes tienen un costu envaloráu de casi 3 millones.
Tolos conceyos qu’integren la segunda fase disponen yá de dalguna escuela de 0 a 3 años, sacante Ayande, que va estrenar una nel edificiu de la escuela-llar. Les restantes escuelines/escolías van asitiase en colexos públicos, pero toes elles van ocupar espacios independientes y van tener la so propia dirección. La conseyería cumple asina col doble propósitu de concentrar nunes mesmes instalaciones la etapa educativa de 0 a 12 años y, coles mesmes, optimizar recursos y reaprovechar espacios inutilizaos nos colexos.
N’Uviéu, van construyise trés escuelines nos colexos públicos La Xesta (3 unidaes), Pablo Miaja (3 unidaes) y El Villar (una unidá). En Xixón, van crease dos centros: nel CP Montevil (4 unidaes) y nel CP Los Campos (3 unidaes). Pela so parte, n’Avilés abrirán otros dos, nel CP Marcos del Torniello (4 unidaes) y nel Poeta Juan Ochoa (3 unidaes).
Nel restu de conceyos abrirá un centru de primer ciclu d’Infantil. La escuelina de Noreña va cuntar con dos unidaes (CP El Condao de Noreña), mientres que les demás van disponer d’una sola unidá: Mieres (CP Teodoro Cuesta), Gozón (aula de San Jorge d’Eres, del CRA Cabu Peñes), Navia (CP Ramón de Campoamor), El Franco (CP Jesús Álvarez Valdés), Cangas del Narcea (CP Obanca), Tinéu (CP El Pascón), Carreño (CP San Félix) y Castrillón (CP Manuel Álvarez Iglesias).
A lo último, la nueva escuelina de Villaviciosa va construyise na aula rural de Quintes, perteneciente al Colexu Rural Agrupáu (CPR) Les Mariñes, anque va depender administrativamente de la escuela infantil La Oliva.
Amás, la escuelina de Pravia va ser una ampliación de la yá esistente y va instalase na mesma parcela del CP Santolaya de Mérida.
Los 16 proyectos que va realizar Asturies ta en fase de redacción. La previsión inicial ye que les obres tean concluyíes y puedan inaugurase primero que remate l’añu. Toles actuaciones tienen un plazu d’execución d’ente mes y mediu y cinco meses.
