La conseyera d’Educación, Lydia Espina, presentó en Degaña’l proyectu de Escuelines de 0 a 3 años pa la zona occidental d’Asturies. Esa rede autonómica y gratuita, que ta prevista qu’entre en funcionamientu a partir de setiembre, englobará a nueve conceyos del occidente, onde van crease 11 unidaes y 188 places.
Asturies va construyir anguaño cuatro escueles en Degaña, Grandas de Salime, Muros de Nalón y Tapia de Casariego, que van ufiertar un total de 98 places. Y, coles mesmes, va asumir les escueles que yá tán construyendo los conceyos de Bual, Santiso d’Abres, Santalla d’Ozcos, Valdés y Villayón, onde vanse crear les 90 places restantes.
Nel casu de Degaña, con un censu de 7 menores de 3 años, va crear una unidá mista con 18 prestes, que pretende allugase nuna edificación independiente dientro de la parcela del Colexu Públicu d’Educación Básica (CPEB) Zarréu.
La conseyera detalló tamién los planes de la primer fase de la rede autonómica, cola inauguración, a partir de setiembre d’anguaño, de 31 escuelines en 30 conceyos, lo que va suponer la creación d’hasta 822 places distribuyíes en 54 unidaes. Pa ello, van invertise 6,58 millones, a los qu’hai que sumar otros 24,57 millones p’aplicar la plena gratuidá de la matrícula. Una vegada rematada esa primer fase, Asturies va disponer de 108 escuelines en 68 conceyos, con una ufierta de 5.188 places.
“Ye una política bien ambiciosa” -repitió la conseyera- “y con una triple vertiente, yá que tien calter educativu, pero tamién pretende contribuyir a la medría de la natalidá y a afitar población na zona rural”. Espina añedió que la xera ye tan complexa como ilusionante: “Somos conscientes de que tamos realizando una xestión pionera n’España y eso supón una presión extra. Pero tamos volcaos, porque ye una política de Gobiernu qu’entepasa la parte educativa”.
A lo último, mentó que dende’l pasáu vienres ta habilitada la consulta previa de la llei que va dar soporte a la futura rede autonómica d’escueles infantiles. Esta norma va regular tanto los nuevos centros xestionaos pol Principáu como los integraos de titularidá municipal o la estensión d’esti serviciu p’atender la demanda.
