Les monxes cismátiques de Belorado nun planeen quedase de brazos cruciaos tres la so rotura con Roma y decidieron treslladase a Asturies pa inaugurar lo que denominen «el primer restorán de clausura d’España». Parello, tienen previsto arrendar l’hotel La Ribera del Chicu, allugáu en Les Arriondes, por un costu mensual de 1.600 euros. Según un comunicáu emitíu pol so voceru, Francisco Canals, l’establecimientu va ufiertar un menú basáu en platos tradicionales asturianos, amás de recetes ellaboraes poles mesmes relixoses.
Les trés monxes que se van treslladar a Asturies van encargase de la cocina y van vivir nes habitaciones del pisu cimeru del establecimientu, garantizando asina la so vida en clausura. Pela so parte, el serviciu nel comedor va tar al cargu de personal contratáu. «Nun se va xuntar la vida de les hermanes nin col restorán nin con nada. Vamos dixebralo totalmente», dixo la exabadesa. Tamién mercaron un terrén de siete mil metros cuadraos, que yá cunta con permisu pa criar animales. Les exclarises tienen dellos proyectos rellacionaos cola cría y l’entrenamientu de perros «pa muyeres maltrataes o la formación de perros guía pa colectivos desfavorecidos, ente otros».
Amás, les monxes nun arrenuncien a Belorado. Nel comunicáu nel que daben anuncia d’esti movimientu argumenten que «busquen fortalecer la so comunidá». Insisten nos problemes económicos que tienen les monxes cismátiques, que «cunten con factures urxentes que pagar y recursos mui llimitaos, lo que les llevó a esplorar otra comunidá autónoma na qu’atopar esta solución temporal».
