El presidente del Principáu, Adrián Barbón, anunció güei que’l próximu 10 de payares va empezar la ronda de contactos colos grupos parlamentarios p’axustar el presupuestu autonómicu de 2024, clave pa reforzar l’estáu de bientar n’Asturies.
“Anguaño la ellaboración ye más complexa, porque’l Gobiernu d’España en funciones entá nun nos unvió los datos sobre les entregues a cuenta, pero nun podemos esperar más. El 10 de payares vamos empecipiar la primer ronda, na que yo voi participar xunto con una representación plural del gobiernu d’unidá progresista y de los dos grupos que lu sofiten”, indicó Barbón na Xunta Xeneral, en respuesta a una pregunta de Foro Asturies. “Convídolos a que busquemos puntos d’alcuerdu”, añedió.
Según esplicó, el refuerzu del estáu de bientar pasa, ente otros oxetivos, por amenorgar les llistes d’espera sanitaries, entainar la valoración de la discapacidá, fortalecer la rede d’atención primaria ya impulsar una Llei de Salú Mental.
Mientres la so intervención nel plenu repasó tamién otros compromisos nesti campu, como la creación d’una mesa específica nel marcu del procesu de concertación social pa encarar la xubilación del baby boom, la reforma del mapa sanitariu empobinada a amenorgar la burocracia, la estensión de les prestaciones de salú bucodental a tola población de cero a seis años, el blindaxe de l’atención a les persones mayores por aciu un gran pactu social y el tresformamientu del modelu de xestión del organismu autónomu ERA.
“Pa esti gobiernu, fortalecer les polítiques del estáu de bientar ye una premisa fundamental”, sorrayó’l presidente.
