La conferencia va tener llugar esti xueves, 16 de febreru, a les 19.00 hores na Antigua Escuela de Comerciu
El Xardín Botánicu Atlánticu empecipia esti añu el ciclu ‘De charla con el Botánico’ con una conferencia del especialista n’arte y xardinería, Ignacio Somovilla. El xueves, 16 de febreru, Somovilla, llicenciáu n’Hestoria del Arte y Derechu y collaborador de diversos medios de comunicación, va convidanos a conocer dellos xardinos del mundu al traviés d’un percorríu históricu que parte de la Villa d’Adriano. Va ser a partir de les 19.00 hores na Antigua Escuela de Comerciu.
Ye la primer actividá programada d’esta iniciativa, enmarcada nes acciones de divulgación que realiza’l Xardín Botánicu, col oxetivu d’averar a la ciudadanía la ciencia y la cultura venceyaes al mundu vexetal.
El ciclu va cuntar en total con un programa de cuatro conferencies y una mesa redonda que se va desenvolver ente febreru y xunu na Antigua Escuela de Comerciu, un llugar céntricu p’averar el Xardín Botánicu Atlánticu a la ciudá. Les charres van tener como protagonistes al científicu del CSIC y divulgador, Fernando Valladares; al escritor, divulgador y collaborador habitual en Radio 3 y Onda Cero, Raúl de Tapia; y a la escritora, miembru de la Real Academia Gallega y coautora del llibru ‘El herbario de Rosalía’, María López Sández.
Per otru llau, la mesa redonda va ser n’abril, coincidiendo col 20 aniversariu del Xardín Botánicu, y nella van participar representantes del Xardín Botánicu Nacional de Cuba, el Real Xardín Botánicu de Córdoba, del Jardí Botànic de la Univeritat de València y del propiu Botánicu de Xixón.
La entrada pa toes estes actividaes ye llibre hasta completar aforu.
