L’Institutu de Desenvolvimientu Económicu del Principáu (Idepa), organismu autónomu adscritu a la Conseyería d’Industria, Empléu y Promoción Económica, concedió ayudes a 60 empreses pa proyectos d’inversión por un valor de 4,4 millones na convocatoria de 2021. Estes subvenciones van movilizar un gastu global de 53 millones, de la que van dexar crear 101 nuevos empleos y caltener otros 1.015.

En comparanza cola convocatoria de 2020, supérense delles cifres: el gastu nes ayudes xube nun millón, van recibir financiamientu 29 proyectos más, van crease 35 puestos de trabayu más y va garantizase el sostenimientu de 699 más.

Esta llinia, dirixida a autónomos, pymes y grandes empreses, tien como oxetivu favorecer la inversión productiva por aciu actuaciones intensives en capital, tecnoloxía y empléu. Tamién se sofiten procesos que dexen amontar la competitividá y productividá de les empreses, col fin de garantizar que puedan defendese con ésitu nos distintos mercaos. En total, esta vegada presentáronse 98 solicitúes.

En concreto, finánciense activos materiales (terrenes, edificios, instalaciones, maquinaria y otros equipos) ya inmateriales (aplicaciones informátiques, propiedá industrial o concesiones alministratives), que cunten con un importe subvencionable igual o superior a 50.000 euros.

Les compañíes beneficiaries englóbense nel sector industrial, los servicios destinaos al desenvolvimientu de la sociedá de la información y la innovación, el catering pa centros de gran consumu, les plataformes loxístiques, los llaboratorios d’ensayu de productos, el reciclaxe y dellos proyectos turísticos.

De 2019 a 2021 recibieron el respaldu del Idepa pa los sos proyectos d’inversión 107 empreses asturianes, con una ayuda global de 10,6 millones. Estos fondos facilitaron la creación de 215 nuevos empleos y la movilización de más de 98 millones n’inversión.

El resolvimientu de les ayudes de la última convocatoria va publicar nel Boletín Oficial del Principáu (Bopa) el próximu llunes, día 10 de xineru.