Llaboral Centru d’Arte y Xixón IMPULSA ponen en marcha la quinta Convocatoria de Residencies Llaboral_IMPULSA. Les residencies ufiertaes van tener una duración máxima de 9 meses y van empezar a partir del mes de mayu. Esti programa de collaboración ente Xixón IMPULSA, del Conceyu de Xixón, y Llaboral Centru d’Arte y Creación Industrial, empecipió en 2017. El so oxetivu, a lo llargo d’estos seis años, foi revisar cuálos podríen ser güei les conexones potenciales qu’abran les víes de desenvolvimientu creativu, llaboral y empresarial pa les nueves xeneraciones.
Mientres estos años, más de 30 proyectos fueron escoyíos nesta convocatoria ente los qu’atopamos ámbitos tan variaos como’l diseñu gráficu y testil, proyectos de curtiumetraxes d’animación, producción cinematográfica y audiovisual, aplicaciones
móviles, cerámica, distribución, estudios d’arquitectura, etc. El programa parte de la doble implicación del Conceyu de Xixón: per un sitiu, nel fomentu y sofitu a les industries cultural y creativu, y, por otru, la conexón ente los distintos axentes de la Milla del Conocimiento pa la concreción de proyectos que xeneren nueves empreses y, por tanto, riqueza nel conceyu.
Pel so llau, Llaboral Centru d’Arte ta especializáu en producir, espublizar y favorecer l’accesu a les formes culturales nacíes del usu creativu de les tecnoloxíes de la información
y la comunicación (Tics) amás de conocer el territoriu asturianu y el so contestu económico y social. El programa Llaboral IMPULSA ufierta un espaciu de trabayu compartíu y espacios pa xuntes, ensayos/pruebes y/o presentaciones.
Amás, Llaboral pon a disposición de los y les residentes los llaboratorios de diseñu y fabricación dixital, d’audiovisuales y soníu, con una formación inicial nel usu d’estes tecnoloxíes y una bolsa d’hores pal so usu en díes y horarios concretos a la selmana.
Llaboral va actuar tamién como plataforma local, nacional ya internacional d’alcuentru y collaboración ente artistes, científicos y técnicos. Ufierta una redolada estimulante d’alcuentros, esposiciones, seminarios y conferencies. IMPULSA ufierta a los y les residentes la oportunidá de participar nos programes de sofitu al emprendimientu y al
afitamientu empresarial que dicha entidá desenvuelve na so actividá cotidiana (colos criterios establecíos por IMPULSA pa tal efectu nos distintos programes).
Les Residencies Llaboral IMPULSA tán dirixíes a iniciatives innovadores rellacionaes con industries creatives y culturales de la era dixital, que propongan tou tipu de proyectos
de nuevu formatu, incluyíos aquellos rellacionaos coles tecnoloxíes del mediu ambiente, la salú o l’alimentación y el so impactu o influencia na cultura y na sociedá. La convocatoria, que va tar abierta hasta’l próximu 5 d’abril, va escoyer un máximu de 8 proyectos.
