El xuráu encargáu d’evaluar les candidatures de les persones aspirantes al puestu de dirección-xerencia de LLABoral, Centru d’Arte y Creación Industrial escoyó 15 de les 68 presentaes pal cargu, completando asina la primer fase del procesu.

N’analizando la documentación, el xuráu puntuó en función de los criterios recoyíos nes bases del procesu. Asina, ente otres cuestiones, tuviéronse en cuenta la formación académica y la esperiencia profesional n’ámbitu del arte contemporaneu y na xestión d’equipamientos culturales. Valoróse tamién la conocencia del panorama artísticu asturianu actual.

Les puntuaciones publicáronse güei na páxina web de la Fundación La Llaboral, Centru d’Arte, Creación Industrial y Promoción Cultural, www.laboralcentrodearte.org. Les quince persones con más puntos pasen a la segunda fase, que consiste na presentación, nos 20 díes próximos, d’un proyectu pa Llaboral Centru d’Arte. Tres esta segunda parte del procesu, va quedar una tercera consistente na entrevista d’evaluación y defensa del proyectu.

Por cuestiones de protección de datos, Llaboral nun facilita les identidaes de candidatos y candidates, que cunten con un númberu personal de referencia. El xuráu ta integráu por Ana González, Pablo León, Jorge Fernández León, Pau Waelder, Concha Jerez y Roberta Bosco.

La convocatoria realizada por Llaboral, Centru d’Arte y Creación Industrial llogró una amplía respuesta, con 68 candidatures presentaes por profesionales que, nos más de los casos, tienen esperiencia amplia nel campu artísticu y na xestión d’instituciones culturales. Les propuestes presentaes vienen de diversos puntos d’España y de dellos países americanos.

El patronatu de la Fundación La Llaboral, Centru d’Arte, Creación Industrial y Promoción Cultural aprobó’l pasáu payares les bases pa la convocatoria del puestu de la dirección-xerencia del centru d’arte, que primeramente se treslladaron a la comisión científica pa qu’esti órganu asesor realizare les aportaciones oportunes.

La convocatoria pa la provisión del puestu, por una duración de 5 años prorrogables, especifica que la persona axudicataria va exercer la máxima responsabilidá de la dirección y xestión de la fundación, solo subordinada a les decisiones qu’adopten los órganos de gobiernu (patronatu y comisión executiva) y asesorada pola comisión científica.