Xixón celebra esti martes los XVII Alcuentros de la Mocedá cola Llingua. Sicasí, va ser una celebración bien diferente a la d’años anteriores. L’actual estáu d’alarma va obligar a treslladar los actos al ámbitu virtual. «Vamos siguir percibiéndonos colos sentíos y col entendimientu, anque seya al traviés de les pantalles», señala la Oficina de Normalización nuna nota de prensa.
Una sale d’escape virtual va ser la principal protagonista de la programación. ‘Misteriu nel Muséu del Pueblu d’Asturies’ cunta la hestoria de seis rapaces y cuatro rapazos que se faen llamar ‘La Promoción Pantasma’. Nun pudieron salir del muséu a cuenta d’una falcatrúa d’unes criatures maldadoses… L’alumnáu d‘asturianu de Secundaria tendrá de contestar bien dalgunes entrugues sobre otres ediciones de los Alcuentros de la Mocedá cola Llingua pa lliberar a La Promoción. El miércoles ufriránse delles pistes de la mano de los protagonistes que participaron n’otres ediciones de los Alcuentros.
