El Gobiernu asturianu autorizó mayores axustes nes frecuencies de los autobuses de tresporte interurbanu públicu. L’enfotu del Executivu ye amenorgar los viaxes de la población cola mira de contener el COVID-19 mediante la restricción al máximu de la movilidá. Asina, van caltenese los servicios «realmente necesarios» por cuestiones llaborales y va primase l’accesu a los centros sanitarios.
Estes midíes van concretase, a partir del sábadu, nel amenorgamientu de frecuencies mientres les fines de selmana. Esta midida va afectar especialmente a les denominaes ‘hores valle’ y de servicios que nun tuvieron pasaxeros la selmana pasada. Amás, va suprimise’l pagu n’efectivo del pasaxe. L’accesu va realizase col billete únicu en tolos servicios interurbanos per carretera dependientes del Consorciu de Tresportes d’Asturies (CTA). Anguaño, un 75 % de los pasaxeros usen dalguna modalidá de tarxeta.
D’esta miente, impídese’l contactu colos conductores. El CTA quier evitar viaxes innecesarios, al tener que prevese los sos desplazamientos y adquirir títulos pa movese. Esta midida tamién va permitir llevar un contéu exactu de los pasaxeros de los autobuses, cola cuenta de controlar la movilidá si hubiera que tomar midíes adicionales. La web del CTA (www.consorcioasturias.com ) ufierta información sobre’l cambéu de servicios y los cuasi 300 puntos de venta y recarga del billete únicu que siguen abiertos.
Otra manera, el ministeriu decretó amenorgamientos de servicios pa la rede cercaníes de Renfe y Feve n’Asturies, que van entrar en vixencia’l sábadu y qu’algamen porcentaxes del 25 % y del 50 %, respectivamente.
