Los cementerios municipales de Xixón recuperen la normalidá pa celebrar Tolos Santos tres les midíes de prevención adoptaes los postreros dos años por cuenta del andanciu de la COVID-19.
Como ye habitual na festividá señalada, CEGISA va ampliar los servicios col fin de recibir a les persones visitantes nes distintes instalaciones. Nesi sen, EMTUSA aumentó la frecuencia d’autobús de la llinia 25 a Deva dende’l 22 d’ochobre, con salíes dende Tremañes cada hora ente les 09.30 hores y les 17.30 hores y regresu tamién cada hora ente les 10.25 hores y les 18.25 hores. El martes, 1 de payares, va sumar a esti horariu un autobús especial cada hora ente les 09.30 hores y les 14.30 hores con salida dende la Plaza del Carmen y regresu del Cementeriu de Deva ente les 10.00 hores y les 14.00 hores.
Tamién se va habilitar una llínea especial dende la plaza del Humedal a Ciares ese mesmu día con salíes aprosimao cada 30 minutos ente les 09.30 hores y les 18.30 hores. Coles mesmes, les floristeríes d’estos cementerios y del de Xove van abrir n’horariu continuu.
Tocantes a los servicios relixosos, la programación prevista ye la siguiente:
-Deva: va celebrase la misa’l día 1 de payares a les 12.00 hores.
-Ilesia de San Andrés de Ciares: les mises celebrarán el día 1 de payares a les 12.00 hores y el día 2 de payares a les 16.00 hores.
-Ilesia de Xove: la misa celebrará’l día 1 de payares a les 11.30 hores.
-Somió: visita al cementeriu’l día 1 de payares a les 17.00 hores y misa na Ilesia’l día 2 a les 19.30 hores.
-Cabueñes: visita al cementeriu’l día 1 de payares a les 17.00 hores.
-L’Abadía Cenero: visita al cementeriu’l día 1 a les 17.00 hores.
-Tremañes: la misa va tener llugar el día 1 de payares a les 17.00 hores.
-Valdornón: visita al cementeriu’l día 1 de payares a les 11.30 hores y, darréu, misa na Ilesia.
Per otru llau, cabo señalar que’l Cementeriu Municipal de Deva cuenta yá con más de 6.600 unidaes d’enterramientu. A principios d’esti añu abrióse la cuarta Sala de Columbarios pa cenices y mientres estos meses fuéronse realizando delles obres d’ampliación. Destaca un bloque de panteones con capacidá pa trés nichos y l’acondicionamientu de la sesta parcela que va formar el sestu Monte de Cenices del Parque de Cenices gracies a la cual amplíase la so capacidá hasta los 300 árboles.
