Los drones de la Dirección Xeneral de Tráficu yá pueden entamar a multar nes carreteres asturianes. Coincidiendo cola puesta en marcha de la segunda operación especial de tráficu del branu, l’organismu estatal va empezar a denunciar a aquellos conductores qu’incumplan la normativa de tráficu y seyan detectaos por estes aeronaves. Ye una midida que ya adelantara’l director xeneral de tráficu, Pere Navarro. Estos aparatos van vixilar aquellos tramos onde’l riesgu de accidentabilidá ye mayor, les carreteres con mayor tránsitu d’usuarios vulnerables y supervisar distracciones mientres la conducción.
Los drones son capaces de detectar si un conductor lleva puestu’l cinturón de seguridá o ta utilizando’l teléfonu móvil. Tienen una altitú operativa d’hasta 120 metros, un radiu d’acción d’unos 500 metros. Amás, cunten con cámares d’alta definición con visión de 7 kilómetros. La so autonomía ye de 20 minutos.
Los nuevos drones de la DXT tamién s’utilicen pa monitorizar y sofitar la regulación n’operaciones y eventos especiales nos que se concentra un eleváu númberu de movimientos en carretera. Los drones van reforzar amás en misiones ordinaries de regulación complementaries a les desenvueltes polos helicópteros y a sofitar en situaciones d’emerxencia.
