Los Gijón Mariners volvieron de vacíu de Zaragoza en cayendo énte los Hurricanes por un afechu 8-6. Los asturianos fueron per delantre del marcador mientres casi tol partíu pero nun pudieron caltener la so curtia ventaya. Nel primer tiempu namás xubieron trés puntos al marcador, con un field-goal tresformáu por Sergio Andrés pero’l gran trabayu especialmente de la llínea defensiva (6 sacks nel so haber) dexó a Mariners llegar al descansu con una mínima ventaya (0-3). Na continuación los asturianos roblaron un gran drive pero apexar nes yardes finales y tuvieron que conformase con anotar de nuevu gracies al aciertu del so kicker con otru field goal (0-6).
Dempués de que los verdinegros vieren como yera anuláu una espectacular torna de puntu per parte de Hilario Lantarón, los Hurricanes xustu antes de cerrar el tercer cuartu, consiguieron dar la vuelta al partíu. El quarterback mexicanu Alan Macedo, unu de los refuerzos del conxuntu zaragozanu, foi clave na remontada, con un espectacular pase fondu a Daniel Falcón que se convirtió nel únicu touchdown del partíu (6-6).
Nel tresformamientu posterior, amás, el quarterback de Hurricanes volvió ser decisivu. Los zaragozanos, nel intentu de extra-point, fallaron nel snap, pero’l kicker, Ángel Vicente, pudo prindar el balón y cuando diben placalu sacó de la manga un pase retrasáu a Macedo, en funciones de holder, qu’acabó con dos puntos nel marcador. El mexicanu nun esbardió la oportunidá y sacó’l so brazu esquierdu pa conectar con Ángel Marín na end-zone y asitiar el definitivu 8-6.
Nel últimu periodu los xixoneses tuvieron oportunidá de volver recuperar el lideralgu nel partíu cuando un gran pase del quarterback Marcos Martínez yera atrapáu por Lantaron na yarda 8 local. Dos sacks de la defensa local favorecieron una mala posición de campu y l’intentu de field goal dende 47 yardes per parte de Sergio Andrés quedóse curtiu nesta ocasión. Los Hurricanes consumieron el tiempu restante y col 8-6 lleváronse’l trunfu.
