El gobiernu d’Asturies va poner en marcha, en collaboración cola Inspección de Trabayu y Seguridá Social n’Asturies, un plan de choque pa revisar los sistemes de prevención de riesgos llaborales. Les midíes que se van poner en marcha inclúin un estudiu sobre siniestralidá llaboral en sectores con un índiz d’incidencia d’accidentes, tanto leves como graves, per enriba de la media, y el refuerzu nel personal técnicu de prevención p’ayudar nes inspecciones.
La xunta rectora del Institutu Asturianu de Prevención de Riesgos Llaborales (IAPRL), integrada por l’Alministración, Inspección, axentes sociales y la Federación Asturiana d’Empresarios (Fade), aconceyó ayeri en sesión estraordinaria p’analizar los accidentes llaborales de les últimes selmanes.
El conseyeru de Ciencia, Empreses, Formación y Empléu, Borja Sánchez, presidente de la xunta, indicó qu’al curtiu plazu, va realizase una revisión de los sistemes de prevención de riesgos llaborales, tanto documentos, como procedimientos, ya inspecciones. Esti plan de choque va centrase especialmente en “nos sectores onde reparemos una incidencia d’accidentes mayor a la media”, precisó.
Esta revisión realizará tanto sobre los accidentes graves y mortales como en dellos accidentes leves que por ser atípicos puedan apurrir información importante.
L’oxetivu, según indicó’l conseyeru, ye que l’estudiu tea fechu de cara al plan operativu en prevención de riesgos llaborales del próximu añu, nel que s’incluyiríen yá midíes concretes.
Amás, una de les acciones que se van poner en marcha ye la convocatoria de cuatro places vacantes de técnicos de prevención de riesgos llaborales dientro del IAPRL pa que puedan ayudar nes inspecciones d’esti plan de choque.
