Nun mes de xunu de 1992 abría en Xixón una tienda, Papagayo’s, que col tiempu diba convertise nuna marca de diseñu de ropa femenina presente en numberosos países y vestida por millones de muyeres nes trés décades últimes, Mamatayoe.

Naquella tienda de barriu taba yá Cris González, actual directora del equipu de diseñu de Mamatayoe, y ellí entamó a facer los primeros diseños propios que vendíen na tienda. L’ésitu de les propuestes fixo qu’entamaren a abrir más tiendes n’Asturies y dempués Madrid, llegando a crear una rede de franquicies con más de cincuenta puntos de venta.

Tres un cambiu na filosofía de la marca, Mamatayoe dio un impulsu nuevu a les sos creaciones llegando a difundise en más de trenta páises, dende Italia y Francia, dos de los principales mercaos, a Australia o Estaos Xuníos, pasando per Xapón o Canadá, algamando dellos premios, ente los que destaca’l Premiu Nacional a la Escelencia en Moda.

Una de les apuestes de la marca asturiana foi dende l’entamu l’apueste pola fabricación de cercanía, coles garantíes de calidá y condiciones llabores que namás la fabricación n’Europa pueden dar. Nesti momentu la fabricación faise en Portugal, centralizando n’Asturies la parte loxística, alministrativa, comercial y por supuestu de diseñu.

Magar la internacionalización de la marca, Mamatayoe nun perdió nunca’l so espíritu, el d’una marca de moda allegre que reflexa xuna amiestu equilibrao ente hestoria y naturaleza, ambiente caseru y paisaxes del mundu, coloríu y orixinalidá.

Cada temporada les colecciones tán inspiraes n’ellaboraes hestories inspiraes en llugares y cultures del mundu, onde nun tuvo ayena la presencia d’Asturies, como na colección dedicada a les sidres del mundu, na que numberoses prendes llevaben el nome de mazanes asturianes.

Tolos estampaos, los bordaos, los motivos son creaos dende’l so entamu pol equipu de diseñu, consiguiendo una orixinalidá y esclusividá única, que faen de Mamatayoe una marca de moda diferente y especial con yá trenta años al llombu.