La cuarta y última etapa de la Vuelta Ciclista a Asturies deparó otru espectáculu de ciclismu dende’l primer kilómetru. L’alcaldesa de Navia, Ana Isabel Fernández, cortó la cinta de salida esta mañana y la caravana de la vuelta despidía l’occidente asturianu tres dos xornaes col públicu de la zona enfotáu colos ciclistes. Dende l’entamu de la prueba los corredores impunxeron un fuerte ritmu, hasta que se fixo un corte con un grupu de 22 corredores en cabeza, nel que destacaben nomes como’l del mesmu líder Marc Soler acompañáu de Adriá Pericas, dambos del UAE Emirates-XRG. Hasta cuatro representantes del equipu Movistar; Barta, Cortina, Pedrero, Pescador y Serrano. Caxa Rural-Seguros RGA y Kern Pharma llevaben cuatro homes caún nel grupu nel que tamién viaxaben Txomin Juaristi y Alexin Guerin, amenaciando la segunda y tercer posición de la xeneral qu’ocupaben los asturianos Hugo de la Calle y Samuel Fernández, que nun consiguieron entrar na fuga.
L’equipu Burgos Burpellet BH, tiraba del pelotón na ascensión al Altu de la Espina, pero les diferencies nun menguaben, anque dellos corredores yá se descolgabean del grupu de cabeza. Per delantre quedaba l’ascensión al Violeo onde Soler, Juaristi y Guerin ocupaben les primeres posiciones al pasu poel altu, con Matteo Vercher siguiéndo-yos de cerca. Hugo de la Calle y Samuel Fernández retorcíense nes dures ramples del puertu intentando amenorgar la ventaya, pero’l trabayu resultó infructuosu y el grupu del líder presentóse nes cais d’Uviéu, onde Marc Soler (UAE Emirates-XRG) impúnxose proclamándose vencedor y afitando la clasificación xeneral. En segunda posición entró Matteo Vercher, mientres qu’Alexis Guerin (Anicolor-Tien21) y Txomin Juaristi (Euskaltel-Euskadi), que llegaron a 16 segundos del vencedor, consiguieron arrampuñar a los mozos asturianos les posiciones de pódium.
Marc Soler foi’l vencedor absolutu de la edición del Centenariu de La Vueltina, superando en 3 minutos y 37 segundos al segundu clasificáu, Txomin Juaristi y en 4 minutos y 15 segundos al terceru, Alexis Guerin. El cuartu puestu foi para Hugo de la Cai (Burgos-Burpellet-BH) a 4 minutos y 27 segundos y Samuel Fernández García (Caxa Rural-Seguros RGA) remató en quinta posición 4 minutos y 51 segundos.
