El 24 d’avientu de 1997, cinco chavales que respondíen a los nomes de Kutxi, Kolibrí, César, Piñes y Alén, xuntábense por primer vegada nunos locales d’ensayu pela redolada de Pamplona pa, ensin querer queriendo, empezar a transitar per una sienda vital y musical que primeramente tuvo por nome La patera, y qu’agora toos conocemos como Amoria. La banda aniciada en Berriozar cumple por tanto 25 años y celebrarálo, como nun podía ser d’otra manera, cola xira Sin riendas 2023, y col llanzamientu d’un nuevu álbum, Los potros del tiempo.
El día 15 de xunetu, Xixón va acoyer, nel recintu Xixón Life, una de les 24 cites que conformen esti periplu de conciertos, nos que Bocanada va exercer como grupu invitáu dende les 22:30 hores.
Como ye lóxicu, estes actuaciones sirvirán-y a la banda pa festexar la so onomástica de plata y volver xubir al escenariu un bon puñáu de los clásicos atesoraos a lo llargo de cinco llustros, pero tamién pa presentar el so nuevu trabayu d’estudiu. Amás, l’álbum llegó a esti mundu de la meyor de les maneres posibles, superando en demasía les mires de vienta más optimistes, lo que nun fixo sinón confirmar que Marea cuenta con un públicu más que fiel qu’amás crez inexorablemente col pasu de los años.
