Mario Suárez Del Fueyo abandona la dirección de Podemos Xixón

"Paso a la reserva. Ye'l momentu d'anovar una secretaria xeneral qu'afite organizativamente el partíu y que faiga pasar a Podemos de l'adolescencia a la madurez"

0
116

Mario Suárez del Fueyo abandona la dirección de Podemos en Xixón. El que fuera voceru municipal presentó esti martes la so dimisión como secretariu xeneral de la formación morada na ciudá. Del Fueyo dexa tamién el puestu qu’ocupaba nel Conseyu Ciudadanu municipal. «Paso a la reserva. Ye’l momentu d’anovar una secretaria xeneral qu’afite organizativamente el partíu y que faiga pasar a Podemos de l’adolescencia a la madurez».

El hasta agora secretariu xeneral de Podemos Xixón xustifica la so decisión porque «enxamás entendí la política como unu oficiu». «Siempres interpreté como natural que’l pasu poles instituciones tienen una llimitación temporal», esplica nuna carta na que comunica la so decisión. Critica la decisión del nuevu equipu de gobiernu municipal de xubise’l sueldu y comprométese a siguir trabayando en comuña coles tres conceyales de la formación morada.

Del Fueyo confiesa qu’estos cuatro años y mediu al frente de Podemos Xixón foi un tiempu «de gran intensidá y complexidá política, con una organización que nacía de la ilusión y la indignación pero ensin estructures». El ya ex secretariu xeneral de la formación morada na ciudá llamenta «fondamente» la imposibilidá de llograr una candidatura d’unidá con Izquierda Xunida pa les elecciones municipales del pasáu 26 de mayu. «Foi un mal cálculu electoralista que se pagó con intereses negativos nes urnes», reconoz.

Na so carta de despedida apuesta por un gobiernu de coalición con Xuníes Podemos. «Ye la única garantía pa unes polítiques sociales y medioambientales de llargu alcance». Critica la «invisibilización» de Podemos na Xunta Xeneral y ufierta «el mio sofitu y collaboración» al secretariu xeneral, Daniel Ripa, y a la vocera parlamentaria de Podemos Asturies, Lorena Gil.