L’alcaldesa de Xixón xúbese’l sueldu

El sueldu de la primer edil va medrar hasta los 67.529 euros, 2.584 euros más de los 64.945 qu'ingresaba Carmen Moriyón

0
716
Sueldu de l'alcaldesa de Xixón
Ana González colos conceyales del PSOE. / PSOE

El sueldu de l’alcaldesa de Xixón va xubir hasta los 67.529 euros. L’incrementu de les retribuciones previstu pol nuevu equipu de gobiernu tamién va beneficiar a los conceyales lliberaos, que van pasar a ingresar 6.600 euros más que na pasada llexislatura. Ye la propuesta de la nueva responsable de Facienda, Marina Pineda. De salir alantre, el sueldu de la primer edil va medrar hasta los 67.529 euros, 2.584 euros más de los 64.945 qu’ingresaba Carmen Moriyón.

El sueldu de l’alcaldesa de Xixón nun va ser l’únicu que xuba. Los ediles lliberaos tamién van ver incrementada la so asignación. De 52.073 euros brutos al añu a cerca de 58.000. Nel casu de les lliberaciones parciales, los asignaciones van pasar de los 39.000 a los 43.000 euros. Esta decisión llega depués de dos mandatos colos sueldos conxelaos. La intención agora ye que los conceyales lliberaos de cada grupu políticu vean ameyoraes les sos condiciones pa equiparase coles d’un director xeneral.

«Supón un mui mal entamu del mandatu», llamenta Yolanda Huergo

La propuesta de xubida de los sueldos de los conceyales va salir previsiblemente alantre al cuntar cola única oposición de Podemos-Equo. Les tres representantes de la coalición soscribieron un compromisu éticu qu’inclúi la llimitación salarial. «Supón un mui mal entamu del mandatu», aseguró Yolanda Huergo, vocera de la coalición.

No que sí parez que va haber alcuerdu ye nel repartu de les lliberaciones. El Conceyu tien llimitaes a 18 el total de lliberaciones a repartir ente los conceyales del Plenu. El PSOE va quedase con diez d’elles, dos van corresponder a Ciudadanos como primer fuercia de la oposición, el restu de grupos van quedar con una caún.