El presidente d’Asturies, Adrián Barbón, anunció güei que l’actual directora xeneral d’Infancia y Familia, Marta del Arco Fernández, va ser la nueva conseyera de Derechos Sociales y Bientar, en sustitución de Melania Álvarez, propuesta pa ocupar l’escañu nel Senáu por designación autonómica. “Esta ye la nuesa apuesta pa que’l gobiernu d’unidá progresista y reformista siga avanzando”, valoró.
Marta del Arco (Salamanca, 1959) ye diplomada en Maxisteriu pola Universidá d’Uviéu y educadora social habilitada pol Colexu Profesional d’Educadores Sociales de Cantabria. Funcionaria de carrera d’Asturies dende 1986, dirixe les polítiques d’infancia y families dende 2021. Amás, ye representante habitual en comisiones de coordinación interinstitucional y profesora convidada nel máster d’intervención socioeducativa de la Universidá d’Uviéu. Tamién foi directora de les cases infantil y xuvenil José Campoamor, en Pravia; Cuatropisos, en Cancienes (Corvera), y xefa de la sección de Centros de Menores nel Institutu Asturianu d’Atención Integral a la Infancia y a les Families.
Na rueda de prensa qu’ufiertó esta tarde p’anunciar la so decisión, Barbón destacó que la nueva conseyera cuenta col plenu respaldu del Executivu autonómicu y respuende al perfil que se buscaba: una muyer progresista, independiente y que provien del ámbitu social. “Marta del Arco conoz perfectamente’l proyectu de llexislatura, tien esperiencia de gobiernu, sabe lo que significa xestionar y tien tol mio enfotu como presidente”, esplicó.
Tamién anunció que’l próximu vienres va roblar los decretos de nomamientu de Marta del Arcu como conseyera de Derechos Sociales y Bientar y de Vanessa Gutiérrez como titular de Cultura, Política Llingüística y Deporte. Dambes van tomar posesión el domingu 18 y esi mesmu día van participar tamién na so primer xunta del Conseyu de Gobiernu.
