Más de mil persones percorrieron ayeri les cais de Xixón baxo un glayíu unánime: la fin de la tauromaquia n’Asturies y, de manera concreta, en Xixón, la única ciudá na comunidá que caltién estos eventos.
«Volvemos manifestar el nuesu refugu escontra esti espectáculu. Entendemos que nun tienen cabida nesta sociedá», señaló la vocera de Asturies Antitaurina, Fernanda Blanco. «Nun s’entiende qu’una persona como l’alcaldesa, Carmen Moriyón, médicu d’oficiu, nun seya capaz d’entender el dolor de los toros, que sufren igual que nós», denunció.
Fueron más de 100 los colectivos que se xuntaron a la manifestación, incluyendo formaciones polítiques como PACMA, Podemos, IX, Verdes-Equo, Somos Asturies Sumar, y Convocatoria por Asturies, mesmo qu’ensame d’asociaciones venceyaes a la protección animal y del mediu ambiente, feministes y sindicalistes.
Esto demuestra’l sofitu de la ciudadanía asturiana a la llucha antitaurina, como yá asocedió n’otres ocasiones. Y ye que más de 30,000 asturianos y asturianes roblaron la Iniciativa Lexislativa Popular “Nun ye la mio cultura” pa desaniciar el blindaxe cultural de la tauromaquia, ente los que destaquen personalidaes del mundu de la cultura como Nacho Vegas, Xune Elipe, Pilar Sánchez Vicente, Cristina del Valle, Ángeles Caso o Rodrigo Cuevas; y políticos como Adrián Barbón, Olaya Suárez, Rafa Cofiño, Verónica Martínez, Covadonga Tomé, Javier Suárez o Noelia Ordieres. Formen parte de les más de 715.000 algamaes en toa España pa reclamar la retirada de la tauromaquia como patrimoniu cultural.
