La tarxeta CONECTA consolídase como la referencia del sistema de movilidá pública n’Asturies. Más del 86% de los viaxes realizaos en tresporte públicu per carretera nos cuatro primeros meses del añu validáronse col billete únicu asturianu. En cifres absolutes, 16.425.899 de los 19.064.137 desplazamientos rexistraos de xineru a abril pagáronse con CONECTA. Amás, el númberu de trayectos aumentó un 6,3% respectu al primer cuatrimestre del 2025.
Un total de 450.000 persones disponen yá de la tarxeta CONECTA en tola comunidá. Los datos del Consorciu de Tresportes d’Asturies (CTA) confirmen que’l tresporte públicu sigue ganando usuarios gracies al apueste decidíu del Gobiernu del Principáu.
Asina, les cifres mensuales amuesen un nivel d’actividá que se caltién percima de los cinco millones de trayectos. N’abril, el CTA rexistró un total de 5.145.916 trayectos, lo que supón un 6,5% más que nel mesmu mes del 2025.
La Conseyería de Movilidá, Medio Ambiente y Xestión d’Emerxencies sigue trabayando pa facer más competitivu, cómodu y fiable’l sistema de tresporte públicu per carretera. Con esti fin, el CTA va incorporando progresivamente nuevos servicios y refuerzos en rutes con alta demanda o que precisen ameyorar la cobertoria horaria en determinaes franxes o facilitar la conexón con nodos estratéxicos como los hospitales. L’Executivu autonómicu concibe la movilidá y el tresporte públicu como elementos esenciales pa vertebrar el territoriu dende’l puntu de vista social y xeográficu.
