Más d’un centenar d’investigadores de la Universidá d’Uviéu súmase a la conmemoración el sábadu, 11 de febreru, del Día Internacional de la Muyer y la Neña na Ciencia, con un curiosu cartelu de conferencies, monólogos científicos, una campaña de sensibilización o un almuerzu científicu que, col lema YoSoiCientífica, pretende visibilizar la contribución de les muyeres na ciencia y captar nueves vocaciones ente les xeneraciones más nueves. Les actividaes, qu’anguaño lleguen a la so séptima edición, fueron diseñaes pol Vicerrectoráu d’Investigación, al traviés de la Unidá de Cultura Científica y de la Innovación (UCC+I) de la universidá asturiana.
Les principales acciones diseñaes pola Universidá d’Uviéu pal Día Internacional de la Muyer y la Neña na Ciencia son estes:
Pioneres de la ciencia
La universidá va espublizar, al traviés d’una esposición urbana, ilustraciones que representen a seis muyeres pioneres. Les científiques Margarita Salas, Hipatia d’Alexandría, Mary Anning, Hedy Lamarr, Marie Curie o Jane Goodall van tener una ilustración nos mupis d’Uviéu, Xixón y Mieres. La institución académica quier animar a la comunidá universitaria y a la sociedá asturiana a afayales y compartir en redes sociales informaciones sobre quién fueron, cuálos fueron les sos contribuciones o sobre si sirviéron-yos de referente ya inspiración. La Conseyería de Ciencia, Innovación y Universidá, al traviés de los Conceyos con Ciencia, distribuyó amás les ilustraciones por que seyan asitiaes en centros sociales, biblioteques o escaparates de tiendes y, d’esta miente, dar a conocer el llabor d’estes pioneres de la ciencia a públicu xeneral.
Elles cunten
Esta iniciativa ta integrada por un ciclu de conferencies de divulgación científica impartíes por investigadores de la Universidá d’Uviéu p’averar los estudios de muyeres de toles árees de conocencia. Les temátiques son diverses y van dende muyeres referentes o esperiencies personales hasta les sos trayectories profesionales o contribuciones científiques. Nesta edición, solicitaron participar 73 centros educativos de la rexón pa 5.562 alumnos d’Infantil, Primaria, Secundaria, Bachilleratu y FP. Mediu centenar de conferencies yá tán confirmaes y van impartise a lo llargo del mes de febreru. Dalgunos de los títulos más demandaos fueron Cómo he llegado a científica, Matemáticas, mujeres e inteligencia artificial ¿combinan? o Conciencia de mujer.
Almuerzu con Inxenieres
El vienres, 10 de febreru, a les 9:30 hores, trés estudiantes universitaries d’últimu añu de delles titulaciones del Campus de Xixón van visitar el colexu d’Educación Secundaria La Inmaculada, de Xixón, onde van compartir en grupos amenorgaos un almuerzu científicu y van charrar de manera distendida sobre la so trayectoria na so formación académica y proyectos presentes y futuros.
Ciencia con cabeza CienciaInclusiva
Esta actividá consiste nun espectáculu de títeres nel que les investigadores Beatriz Ramajo y Ana Elisa Valdés van representar a Marie Curie y Rosalind Franklin y van protagonizar dos monólogos científicos pa cuntar al alumnáu del Colexu Públicu d’Educación Especial Latores (Uviéu) y al Colexu Públicu d’Educación Especial Castiellu (Xixón) les sos vides y aportaciones a la ciencia. L’espectáculu va tener llugar el martes 14 y miércoles 15 de febreru.
