La Conseyería de Mediu Rural y Política Agraria punxo en marcha un plan de continxencia énte la detección en Siero de cuatro exemplares d’avispón soror (Vespa soror), una nueva especie invasora procedente del sureste asiáticu.
El Centru d’Alerta y Control de Plagues y Especies Invasores ellaboró un protocolu qu’inclúi la monitorización intensiva y l’instalación d’una rede de trampes na zona na que se confirmó la presencia d’estos artrópodos. Amás, col afayu d’estos avispones diose voz de a tolos organismos y colectivos implicaos, incluyíu’l Ministeriu pa la Transición Ecolóxica y el Retu Demográficu, que se va encargar d’espublizalo al traviés de la Rede d’Alerta d’Especies Invasores.
Asturies, qu’investiga la vía d’entrada d’esta especie na comunidá, tamién empecipió la ellaboración de cartelería pa sollertar sobre la so presencia y estableció canales pa echar voz de nuevos casos.
La revista científica Ecology and Evolution sopelexó apocayá un artículu d’un grupu investigador del área de Zooloxía de la Universidá d’Uviéu que da cuenta del afayu de dos exemplares de Vespa soror en 2022, y d’otros dos en 2023, nuna zona rural al sur de los polígonos de Granda, en Siero.
Una vegada publicada esa información, el Gobiernu d’Asturies punxo de momentu en marcha un plan de continxencia pa evitar la implantación d’esta especie invasora na comunidá. Les midíes incluyíes nesi plan, ente les que figuren les citaes enantes, detalláronse esta mañana nuna xunta a la qu’asistieron distintos organismos y entidaes afectaes.
El avispón soror ye un gran depredador d’abeyes y otros insectos y puede alteriar l’equilibriu biolóxicu de les zones nes que s’implanta. La especie vien de zones subtropicales del sudeste asiáticu y países como China, Tailandia o Vietnam, polo que los espertos consideren que la so adaptación al clima d’Asturies podría resultar complexa.
Al igual que’l restu de avispones, solo suelen atacar en defensa del nial, polo que’l peligru que presenten pa les persones reduzse a estes situaciones. Sicasí, suelen construyilos baxo tierra, a poca fondura, polo que’l riesgu ye mayor que n’otros casos.
Les invasiones biolóxiques son cada vez más esmolecedores a nivel mundial pol so impactu sobre la biodiversidá, la economía y la seguridá de les persones.
