Mieres opta a ser sede de próximes ediciones de la Selmana Europea de Cicloturismu, un eventu que cada añu se celebra nun país européu diferente y que permite descubrir el territoriu en bicicleta. Trátase d’una de les actividaes más importantes qu’organiza la Unión Europea de Cicloturismu (UECT), una organización que dende la so creación en 2002 se convirtió nun espaciu d’alcuentru, intercambiu y collaboración ente federaciones y asociaciones ciclistes europees.
Representantes del Comité Director d’esta organización axuntáronse fai unos díes nel Ayuntamientu de Mieres pa tratar distintos asuntos rellacionaos col cicloturismu européu y ún de los puntos del orde del día foi, precisamente, abordar la posibilidá de que Mieres pueda acoyer una Selmana Europea de Cicloturismu en próximes ediciones. Una propuesta que contó col so sofitu, yá que les y los representantes de la UECT valoraron tolos proyectos que l’Ayuntamientu ta poniendo en marcha pa promocionar el cicloturismu y los deportes de bicicleta nel conceyu. Nesti sentíu, dende l’área de Promoción Económica que dirixe Álvaro González destácase l’importante impactu económicu y el respaldu internacional qu’esto supondría pal proyectu de promoción cicloturista del conceyu.
L’Ayuntamientu de Mieres apostó nos últimos años por impulsar el turismu deportivu y cicloturista y, nesti sentíu, instalóse un quilómetru cero frente a la estación de Renfe y promovióse una iniciativa inédita como’l Retu Territoriu Mineru. Amás, ta en procesu d’axudicación la instalación de dos aparcamientos seguros pa bicicletes nel cascu urbanu y tamién a puntu d’entamar el proyectu de señalización de los 350 quilómetros de rutes de bicicleta de monte col sellu de calidá Bike Territory, una iniciativa que distingue aquellos destinos comprometíos cola escelencia na promoción del turismu de bicicleta, la movilidá sostenible y el ciclismu deportivu y de competición.
