El Gobiernu de Mieres realizó güei la valoración de la Folixa na Primavera: “Mieres volvió ser l’epicentru de la cultura sidrera y el folclore asturiana cola Folixa. Fuimos llugar d’alcuentru y diversión para miles de persones, de toles edaes, onde reivindiquemos lo nueso y amosemos l’enorme talentu qu’hai n’Asturies”, valoró Rocío Antela, conceyala de Cultura y Festexos.
“Dende’l vienres, miles de persones esfrutaron de los conciertos, que fueron un ésitu atayante, y d’una intensa programación na qu’esfrutemos de lo meyor de la cultura popular asturiana”. Quiero agradecer especialmente la collaboración ya implicación de decenes de colectivos, grupos folclóricos, bandes de música, banda de gaites, profesionales de la cultura asturiana qu’arimaron el costazu pa que too fuera un ésitu. La Folixa ye una fiesta qu’entamamos mano a mano con muncha xente”, afirmó Antela.
Mientres la fin de selmana distribuyéronse 4.000 llitros de sidra y per primer vegada incorporóse la sidra ensin alcohol. Hubo once actuaciones musicales, cuntando tamién cola participación de los trés grupos de baille, dos bandes de música y una banda de gaites. Amás, desenvolvióse una intensa programación empobinada a la reciella, con actividaes infantiles que combinaron lo lúdico colo educativo y a les qu’asistieron más de mediu millar de neños y neñes. Tamién s’incluyeron Cancios de chigre, vermú Folixa Underground, Teatru na Cai…
Otru de los elementos que destacó’l Gobiernu local foi l’ausencia d’incidentes mientres la fin de selmana y quixo agradecer el trabayu realizáu pola Policía Local, Protección Civil y Cruz
Roja. “La Folixa ye una fiesta popular nel que les families y les amistaes axúntense pa esfrutar de la cultura y lo meyor d’Asturies. Mieres enllénase de vida y allegría pa recibir la primavera, y facer siendo una cita obligada pa miles de persones de toa Asturies qu’alleguen, añu tres d’añu, a la Folixa”, resumió la concejala de Cultura y Festexos. “La Folixa ye muncho más qu’una fiesta: ye un espaciu d’alcuentru, un homenaxe a los nuesos raigaños y un escaparate de lo meyor que tenemos pa ufiertar”, concluyo Antela.
