Molinero llevó’l domingu per vegada primera’l brazalete de capitán. Los sos galones nel Sporting son d’evidencia. Dende esa veteranía, señaló que “ganar siempres xenera valoraciones positives”. Esplica que “camudó que ganemos”, lo que piensa dempués de que “fixéramos bonos partíos ensin premiu”. Tien claro que “siempres creyimos en nós” y que “el trabayu diariu ye’l que t’ufierta depués los oxetivos”.
Sobre la llarga carrera futbolística de Manu García destacó los sos valores futbolísticos y la so humildá como persona nel tramu d’aprendizaxe que ta viviendo. Sicasí, aportunó en que “lo importante ye l’equipu, toos el xugadores, los que xueguen y los que se queden na grada”. Valoró la importancia de “tener paciencia y tranquilidá pa poder llograr l’equilibriu dende’l trabayu y la engarradiella, siempres cola palabra unión instalada nel vestuariu, y el que tenemos ye espectacular, lo que ye perimportante”. No personal, espunxo que “vini ayudar, a poner el mio granu de sable”. Confiésase feliz en Xixón: “Namás puedo tener bones palabres”.
El vienres l’equipu xixonés va xugar en Cádiz, el líder, con una clara floxura de puntos sobro los demás. “Si ta ende ye por méritos propios: vamos dir ellí con tol respetu, que ye’l mesmu col que diríamos al campu del que cierra la tabla, porque la Segunda ufierta muncha igualdá”, concluyó.
