L’alcalde de Morcín, Maximino García, y l’alcaldesa de Navia, Ana Isabel Fernández, manifestaron a la conseyera d’Educación, Lydia Espina, la so intención d’integrase na rede pública, autonómica y gratuita de 0 a 3 años Les Escuelines. Dambos conceyos cunten nestos momentos con una escuela municipal en funcionamientu.
Espina empecipió la ronda de contactos coles autoridaes municipales con un doble oxetivu: ufiertar tola información necesaria sobre la llei que salió a información pública y resolver duldes cola casuística propia de cada conceyu. Nes próximes selmanes, la previsión de la conseyera ye combinar les entrevistes individuales con xuntes grupales nel territoriu, que yá se tán peracabando.
Acompañada pol director xeneral d’Infraestructures y Tecnoloxíes Educatives, Julio Vallaure, Lydia Espina axuntóse esta mañana col alcalde de Morcín y cola conceyala d’Educación, Noelia Pereira. Falaron del funcionamientu de la escuelina de Monsacro y de la inversión que’l conceyu realizó, con una subvención europea, p’ameyorar la eficiencia enerxética del CP Horacio Fernández Inguanzo. Pela so parte, el Gobiernu d’Asturies comprometióse a acometer l’ameyorar de los baños de la primer planta.
Darréu, axuntáronse cola alcaldesa de Navia, qu’allegó acompañada pola conceyala de Servicios Sociales, Ana Belén González. Nesti casu, tamién analizaron la situación de la rede de 0 a 3 años nel so conceyu y vieron la posibilidá d’ampliar el númberu de places disponibles en colexos públicos del conceyu mientres la fase 2, que se va acometer en 2025.
Per otru llau, encetaron la posibilidá de realizar obres de meyora tanto nel CP Ramón de Campoamor como nel CP Pedro Penzol, los dos centros d’Infantil y Primaria de Navia.
