La Conseyería de Mediu Rural y Política Agraria topó’l cadabre d’un osu pardu nuna zona quebrada y de difícil a accesu conocida como la penona de Xalón, nel conceyu de Cangas del Narcea.
El cuerpu del animal foi alcontráu ayeri, tres recibir un avisu ciudadanu. L’afayu foi confirmáu por axentes medioambientales del Principáu, miembros de Patrulla Osu y personal de la guardería de la zona de Fontes del Narcea, que se movieron hasta’l llugar col sofitu d’un dron.
Según les primeres observaciones, l’osu pudo caer de manera accidental per una fastera nuna contorna llenta y resbaliza, posiblemente siguiendo un rastru mientres el períodu de celu. La cayida, que se produció nuna zona de fuerte pendiente, causaría mancadures fatales al animal. El cuerpu del plantígradu va ser treslladáu al Centru de Recuperación de la Fauna Montesa de Sobrescobiu, onde se va realizar la necropsia.
