El Gobiernu d’Asturies va evaluar la inclusión del polígonu industrial de San Esteban, en Muroos del Nalón, na nueva planificación de suelu industrial que va diseñar anguaño la Conseyería de Transición Ecolóxica, Industria y Desenvolvimientu Económicu.
Esti proyectu foi unu de los asuntos trataos esta mañana pol viceconseyeru d’Industria y Transición Xusta, Isaac Pola, y l’alcalde del conceyu, Celestino Novo, mientres una xunta na see consistorial. El desenvolvimientu d’esti proyectu, que podría empecipiase en 2026 si s’incorpora finalmente nel nuevu plan autonómicu de suelu industrial, ocuparía una parcela de 58.000 metros cuadraos y destinaríase a asitiar nueves actividaes de pequeñes y medianes empreses y a ufiertar espacios pa la implantación d’actividaes qu’anguaño tán asitiaes en zones rurales ensin posibilidaes de suelu pal so crecimientu.
L’área del futuru polígonu de San Esteban, cunta la ventaya de que’l suelu ye de propiedá municipal y de Sekuens, dispón de servicios a pie de parcela y la so configuración dexa un desenvolvimientu axilosu, según esplicó’l viceconseyeru.
Pola añedió que la Conseyería de Transición Ecolóxica tien previstu la ellaboración del nuevu plan de suelu industrial a lo llargo d’anguaño, polo que les actuaciones d’urbanización y desenvolvimientu van empecipiar en 2026.
